चीन छाडेर प्रधानमन्त्री प्रचण्डको पहिलो रोजाइमा पर्यो भारत

१३ पुष, काठमाडौं । प्रधानमन्त्री पुष्पकमल दाहाल‘प्रचण्ड’ आफ्नो पहिलो विदेश भ्रमण भारतबाट सुरु हुने जनाएका छन् । यसअघि प्रधानमन्त्री हुँदा उनले पहिलो भ्रमण भारत कि चीनबाट सुरु गर्ने भन्ने विषय सहजै खुलाउन सकेका थिएनन् । तेस्रो पटक प्रधानमन्त्रीको जिम्मेवारी सम्हाल्न पुगेको प्रचण्डले पहिलो विदेश भ्रमण भारतबाटै हुने संकेत गरेका छन् ।

प्रधानमन्त्री प्रचण्डले भारतीय टेलिभिजन च्यानल एबीपी न्यूजलाई अन्तर्वार्ता दिँदै आफ्नो पहिलो विदेश भ्रमण भारतबाट हुने सम्भावना रहेको उल्लेख गरेका हुन् । अन्तर्वार्ताका क्रममा उनले भनेका छन्,‘मलाई पहिलो पटक जहाँबाट भ्रमणको निम्तो आउँछ, म त्यहीँ नै जान्छु । हिजो मेरो भारतको विदेश सचिव विनयमोहन क्वात्रासँग पनि थोरै कुराकानी भएको थियो । सायद मेरो पहिलो भ्रमण भारत नै हुने सम्भावना देख्छु ।’
दाहाल पहिलो पटक प्रधानमन्त्री हुँदा सन् २००८ मा पहिलो पटक भारतको भ्रमण नगरिकन बेइजिङ ओलम्पिकको उद्घाटन समारोहमा चीन पुगेका थिए । नेपालमा प्रधानमन्त्री नियुक्त भएपछि पहिलो भ्रमण भारतबाट सुरु गर्ने परम्परालाई उनले तोडेका थिए । तर पछि दाहाल स्वयंले बेइजिङबाट फर्केलगत्तै आफ्नो औपचारिक भ्रमण भारतबाटै हुने दाबी गरेका थिए ।

दाहाल दोस्रो पटक प्रधानमन्त्री हुँदा पनि आफ्नो औपचारिक विदेश भ्रमण भारतबाटै गरेका थिए । यसपटक पनि दाहालले आफ्नो औपचारिक विदेश भ्रमण भारतबाटै हुने बताएका छन् । प्रधानमन्त्री दाहालले नेपाल भारत सम्बन्धलाई अघि बढाउने सन्दर्भमा दुवै मुलुकको ‘जेन्युन’ चासोको दुवै देश मिलेर सम्बोधन गर्नु पर्ने बताए । ‘आगामी दिनमा नेपाल र भारत बीचको विशिष्ट सम्बन्ध छ, त्यो हाम्रो इतिहास, हाम्रो भूगोल, हाम्रो संस्कृति, सबै–सबै विषयमा मजबुत बनाउने विषयमै हाम्रो जोड हुन्छ,’ उनले भने ।

दाहालले ओलीले भनेको नेपालमा रामजन्मभूमि, नक्सा बदल्नेको विषय र ओलीले भारतका मान्छे नेपालमा भारतका मान्छेले सरकार बदल्न चाहेको विषयहरु अब इतिहास भएको दाबी गरे । ‘त्यो इतिहास बनिसकेको छ । अब परिस्थिति नयाँ भइसक्यो । नयाँ विश्वासको साथमा कहीँ केही समस्या छ भने त्यो पनि संवादको मार्फतबाट गम्भीरता साथ वार्ता र कुराकानीकै मार्फत् समाधान गर्न सक्छौं र गरिरहेका पनि छौं,’ प्रचण्डले भने ।