शेयरबजार २०२९ विन्दुमा उक्लियो, २ अर्बभन्दा बढीको कारोबार

१४ पुष, काठमाडौं । साताको अन्तिम कारोबार दिन बिहीबार शेयरबजार उकालो लागेको छ । नेप्से परिसूचकमा ५६.८८ अंकले बढेर २०२९.०३ विन्दुमा उक्लिएको छ । बुधबार शेयरबजार ११.८१ अंकले घटेको थियो ।

बिहीबार २५७ कम्पनीको एक करोड ८० लाख २४ हजार ५५९ कित्ता शेयर किनबेच हुँदा २ अर्ब ८६ करोडभन्दा बढीको शेयर कारोबार भएको छ । हिमालय डिस्टिलरी कम्पनीको सर्वाधिक शेयर कारोबार भएको छ । यो कम्पनीको १२ करोडभन्दा बढीको शेयर बिक्री भएको छ । नेपाल दूरसञ्चार कम्पनीको १० करोडभन्दा बढीको शेयर बिक्री भएको छ ।

हिमालय उर्जा विकास, सानीमा जीवन बिमा र सृजनशील लघुवित्तको १० प्रतिशतले मूल्यवृद्धि भएको छ । यता, धौलागिरि लघुवित्तको ९।९९ प्रतिशतले मूल्यवृद्धि भएको हो ।२०८ कम्पनीमा उकलो लागेको छ भने जम्मा ६ कम्पनीमा ओरालो लागेको छ ।

आज सबै उपसुचकमा हरियाली छाएको छ । सबैभन्दा धेरै फाइनान्स कम्पनी ५.३८ प्रतिशतले वृद्धि भएको छ । हाइड्रोपावर ४.९२ र निर्जीवन बिमा ४.३९ प्रतिशतले वृद्धि भएको छ । सबैभन्दा कम म्युचुअल फन्ड १.४१ र बैंकिङमा १.८२ प्रतिशतले वृद्धि भएको नेप्सेले जानाएको छ ।