प्रधानमन्त्री प्रचण्ड र सचिवहरूबीच मन्त्रालयगत कामबारे छलफल

१८ पुष, काठमाडौं । प्रधानमन्त्री पुष्पकमल दाहाल‘प्रचण्ड’ले विभिन्न मन्त्रालयका सचिवहरुसँग सोमबार छलफल गरेका छन् । उनले मन्त्रालयगत कामको विवरणबारे जानकारी लिन सरकारका सचिवहरूसँग छलफल गरेका हुन् । सचिवहरूको रिपोर्ट सुनिसकेपछि प्रधानमन्त्री दाहालले मंगलबार निर्देशनात्मक सम्बोधन गर्ने कार्यतालिका बनाएका छन् ।

आजको विवरण अध्यायन गरेर मंगलबार सबै सचिवलाई राखेर एकमुष्ठ निर्देशन दिने बताइएको छ । तेस्रोपटक प्रधानमन्त्रीमा चयन भएपछि प्रचण्डले पहिलो पटक प्रधानमन्त्री तथा मन्त्रीपरिषद् कार्यालयमा विभिन्न मन्त्रालयका सचिव र विभागीय प्रमुखहरुलाई बोलाई त्यसका कामकारबाहीको विवरण लिएका हुन् ।

सरकार प्रमुखको हैसियतले प्रधानमन्त्री प्रचण्डले विभिन्न मन्त्रालय र निकायको कामकारबाही जानकारी लिने काम सुरु गरेको नेपाल सरकारका मुख्यसचिव शंकरदास बैरागीले नेपालबहसलाई जानकारी दिए । छलफलको क्रममा सचिवहरुले आ–आफ्नो मन्त्रालयको प्रगति विवरण र आफूहरुले भोग्नु परेका समस्याबारे प्रधानमन्त्री दाहाल समक्ष ब्रिफिङ गरेका थिए । सचिवहरूको ब्रफिङको क्रम भोलि मंगलबार मात्रै सकिने र त्यसपछि मात्रै प्रधानमन्त्री दाहालले निर्देशन दिने उनले बताए ।