महामन्त्रीको विज्ञप्तीलाई लिएर कांग्रेसले राख्यो पत्रकार सम्मेलन

२० पुस, काठमाडौं । राष्ट्रिय मेलमिलाप दिवसका अवसरमा महामन्त्रीद्वय विश्वप्रकाश शर्मा र गगन थापाले निकालेको विज्ञप्तिलाई लिएर त्यसबारे पार्टीको धारणा बनाउन नेपाली कांग्रेसले पत्रकार सम्मेलन गर्ने भएको छ ।

बुधबार दिउँसो ३ बजे पार्टी प्रवक्ता डा.प्रकाशशरण महतले केन्द्रीय कार्यालयमा पत्रकार सम्मेलन आयोजना गरेर विज्ञप्तिबारे पार्टीको भनाई सार्वजनिक गर्ने कार्यक्रम राखिएको छ । महामन्त्रीद्वयको माग र भनाइलाई लिएर कांग्रेसभित्र फरक–फरक धारणा आएका छन् ।

आम निर्वाचन र देशको समसामयिक राजनीतिक परिस्थितिबारे जानकारी दिन पत्रकार सम्मेलन गर्न लागिएको भनिए पनि खासमा महामन्त्रीको विज्ञप्तीबारे सभापतिको धारणा सार्वजनिक गर्न लागिएको हो । प्रतिनिधिसभा र प्रदेशसभा निर्वाचनमा खटिएका प्रचार समितिका सदस्य लगायतलाई धन्यवाद ज्ञापन गर्ने कायर्क्रम पनि राखिएको छ । दुई महामन्त्रीले निकालेको वक्तव्यलाई स्वाभाविक रुपमा लिनेदेखि त्यसको विपक्षमा मत राख्नेहरुसम्म देखिएका छन् ।

कार्यान्वयन गर्ने तहमा भएका व्यक्तिहरुले वक्तव्य निकालेर नीति महाधिवेशनको माग गर्नु गलत भएको संस्थापन पक्षका नेताहरुको भनाइ छ । उनीहरुका अनुसार पदाधिकारीले पार्टी सभापतिलाई भेटेर भन्नुपर्ने विषयमा वक्तव्य निकाल्नु गलत भएको बताएका छन् । महामन्त्रीले नीति महाधिवेशन अविलम्ब गर्नुपर्ने माग उठाएका थिए । महाधिवेशन पश्चात् ६ महिनाभित्र गर्ने भनिएको नीति महाधिवेशन छिटो गरौं भन्ने तत्परतालाई अस्वाभाविक रुपमा लिन नहुने संस्थापन इतरका नेताको भनाइ छ ।

उपसभापति पूर्णबहादुर खड्का नेतृत्वमा गठन गरिएको नीति, अनुसन्धान तथा प्रतिष्ठानले नीति माथिको बहस चलाउन सकेको छैन् ।समितिले पनि पूर्णता पाएको छैन् । पार्टी नीतिमुखी बनाउन र निर्वाचित सभापतिले आफूले ल्याएको नीति अनुसार पार्टी परिचालन गर्नका लागि पनि नीति महाधिवेशन गर्नुपर्नेमा महामन्त्रीद्वयको जोड थियो । तर, ६ महिनाभित्र गर्ने भनिएको नीति महाधिवेशन नयाँ कार्यसमिति आएको एक वर्ष भित्र पनि हुन सकेको छैन ।

कांग्रेस केन्द्रीय कार्यालयका मुख्यसचिव कृष्णप्रसाद पौडेलले भने प्रवक्ता महतले गत मंसिर ४ को निर्वाचन र अहिलेको समसामयिक विषयमा धारणा सार्वजनिक गर्न पत्रकार सम्मेलन आयोजना गरेको बताए । उनले चुनावको बेला पार्टीको प्रचार समितिका सदस्यहरुले आ–आफ्नो क्षेत्रबाट भूमिका निर्वाह गरेकाे र नेपाली कांग्रेसलाई पहिलो पार्टी बनाउन सहयोग गरेकोमा धन्यवाद दिन कार्यक्रम राखिएको हो ।नीति महाधिवेशन वा महासमिति बैठकबारे पनि चर्चा हुने बताइएको छ ।