समूहगत छलफलको होडबाजीले कांग्रेसमा तनाव, महामन्त्रीद्वय तार्गेटमा

२० पुस, काठमाडौं । नेपाली कांग्रेस पार्टीको आन्तरिक राजनीति दिनदिनै सरलतातिर भन्दा जटिलतातिर गइरहेको छ । पुष २२ गते बोलाइएको केन्द्रीय समितिको बैठक सारेर समूह-समूहका छलफल, बैठक र भेला सुरु भएका छन् । संस्थापन इतरसमूहले भोली बिहीबार आफुपक्षका सबै तहका नेताहरुको भेला बोलाएको छ । डा. शेखर कोइरालाले नेतृत्व गरिरहेको यो समूहले केन्द्रीय समितिको बैठकमा पार्टी सभापति शेरबहादुर देउवाका कमजोरीबारे साझा प्रस्ताव बनाउन भेला बोलाएको हो ।

कोइराला समूहले भेला बोलाए लगत्तै सभापति देउवाको निवास धुम्बाराहीमा मंगलबार अबेर यसबारे छलफल भएको थियो । छलफलमा सहभागी एक नेताले बताएअनुसार केन्द्रीय समितिको बैठक बस्नुअघि एकचरण कांग्रेसको पछिल्लो अवस्थाबारे सबै प्रदेशबाट जानकारी लिन आवश्यक देखिएपछि बैठक सारिएको हो । केन्द्रीय समितिको बैठक सारेर देउवा पक्षले बुधबारबाटै प्रदेश अनुसार केन्द्रीय सदस्यको छुट्टाछुट्टै छलफल राखेको छ । यी छलफल सबै प्रदेशमा केन्द्रीय समितिको बैठक अघि देउवाको पक्षमा माहोल बनाउन राखिएका हुन् ।

ती नेताले बताएअनुसार इतरसमूहको नेतृत्व गरिरहेका शेखर कोइरालाले उठाएका विषयभन्दा सभापति देउवा आफ्नै महामन्त्रीका कदमप्रति असन्तुष्ट छन् । उनले गठबन्धन बनाउँदादेखि सरकार गठन र त्यसपछिका घटनाक्रममा पनि महामन्त्रीद्वयले सभापतिलाई साथ नदिएर पार्टीहित विपरित कार्य गरेको भन्दै केन्द्रीय समितिमा महामन्त्रीबिरुद्ध समर्थन जुटाउने प्रयास गरिहेका छन् । राष्ट्रिय मेलमिलाप दिवसपछि दिनहुँ जसो धुम्बाराहीमा महामन्त्रीद्वय छलफल र आलोचनाका पात्र बनिरहेका छन् ।

सभापति देउवा र महामन्त्रीबीच संस्दीय दलको नतालाई लिएर टसल सुरु भएको थियो । निर्वाचनमा उम्मेदवार छनोट भएपछि महामन्त्री गगन थापाले आफुले आगामी सरकारको नेतृत्व गर्न चाहेको भन्दै पछि नहट्ने बताएका थिए । पछि उनको चाहनामा अर्का महामन्त्री विश्वप्रकाश शर्माले पनि साथ दिन पुगेपछि देउवा उनीहरुप्रति सकारात्मक देखिएका थिएनन् । सत्ताबाट बाहिरिनु परेको पीडा र कांग्रेस नेताहरुको पार्टीलाई राजनीतिक दुर्घटनामा पारेको आरोपबाट बच्न उनी घरमै बसेका थिए । शनिबार पुष १६ मा मेलमिलाप दिवस थियो तर, देउवाले सभापतिको हैसियतबाट शुभकामनासमेत दिएनन् ।

माहामन्त्रीद्वयले उनीसँग सल्लाह नगरी संयुक्त विज्ञप्ती निकालेर पार्टीमा देउवाको भूमिकाप्रति आलाेचना गर्दै तत्काल नीति महाधिवेशन बोलाउन प्रस्ताव गर्ने कुरा सार्वजनिक गरे । यसपछि देउवा निकट रहेकाहरुको बैठक दिनहु सुरु भएको थियो । केन्द्रीय समितिको बैठकमा सभापति देउवा आफुले गर्दा कांग्रेस यो अवस्थामा आइपुगेको भनेर स्वीकार गर्दै आत्मआलोचना गर्ने पक्षमा छैनन् । यसको दोष महामन्त्रीलाई दिने तयारीमा छन् ।

महामन्त्रीसहित कोइराला समूहले ल्याउने एजेण्डबाट बच्न देउवाले तलदेखि माथिसम्म फरक मोहाल बनाउनुपर्ने निकट सहयोगीहरुको सुझाव अनुसार प्रदेशबाटै उनका पक्षमा आवाज उठाउन सर्कुलर गरियो । प्रदेश पार्टी समितिमा कांग्रेस सभापति देउवाको निर्णय सही थियो भन्ने माहोल बनाउन जिम्मा संसदीय दलका नेतालाई दिइएको बताइन्छ । केन्द्रीय समितिमा आफु पक्षका केन्द्रीय सदस्यहरुको आवाजमा एकरुपता ल्याउनका लागि प्रदेशका सांसदहरुसँग छलफल सुरु गरिएको हो ।

पुष २४ सम्ममा सबै प्रदेशका सांसदहरुसँग छलफल सक्ने देउवाको कार्यतालिका छ । केन्द्रीय समितिको बैठकमा नेविसंघलाई पुर्णता दिनेदेखि विभिन्न विभागहरुमा पनि जिम्मेवारी तोक्ने तयारीमा देउवा छन् । बैठकमा आफु पक्षकै नेताहरुले पनि विरोध गर्नसक्ने अवस्थालाई ध्यानमा राखेर बैठक सार्दै छलफल सुरु गरिएको ती नेताले नेपालबहसलाई बताए । केन्द्रीय समितिमा यसै पनि सभापति देउवाको स्पष्ट बहुमत छ ।

यसै अनुसार प्रदेश १ का देउवा पक्षको बैठक आज बुधबार नै बस्दैछ । ज्ञानेन्द्र बहादुर कार्कीलाई प्रदेश १ का संस्थापन पक्षका केन्द्रीय सदस्यको बैठक गर्न देउवाले निर्देशन दिएका छन् । यसको समन्वय गर्न प्रदेश अनुसारका नेताहरुलाई दिइएको छ । देउवाको यो तयारी पछि कसरी अगाडी जाने भन्नेबारे भोली बिहीबारको भेलामा कोइराला समूहले थप धारण बनाउने बताइन्छ । यसरी दुइपक्ष भिन्नाभिन्नै छलफलमा जुट्न थालेपछि कतिपयले यो छलफललाई कांग्रेस विभाजनको संकेतका रुपमा पनि लिएका छन् ।