प्रधानमन्त्री र राष्ट्रपति नछोड भन्ने महामन्त्रीले माग्ने हैन, गर्ने होः कांग्रेस प्रवक्ता

२० पुष, काठमाडौं । नेपाली कांग्रेसको संस्थापन पक्षले पार्टी सभापति शेरबहादुर देउवालाई गठबन्धनको सरकार बनाउने क्रममा इतरसमूहले राष्ट्रपति र प्रधानमन्त्री पद कुनै पनि हालतमा अरु दललाई नदिन दवाव दिएको र पछि आएर उल्टो अरोप लगाएको बताएको छ । पार्टी कार्यलय सानेपामा बुधबार आयोजित पत्रकार सम्मेलनमा कांग्रेस प्रवक्ता प्रकाशशरण महतले इतर समूहका नेता तथा महामन्त्रीद्वय विश्वप्रकाश शर्मा र गगन थापाले आफ्नो जिम्मेवारी भूलेको आरोप लगाएका छन् ।

महामन्त्रीद्वय गगन थापा र विश्वप्रकाश शर्माले नीति महाधिवेशन गर्नुपर्ने भन्दै विज्ञप्ति जारी गरेको विषयमा प्रवक्ता महतले महामन्त्रीले माग गर्ने नभएर कार्यान्वयन गर्नुपर्ने बताए । उनले भने, ‘नीति महाधिवेशनमा महामन्त्रीद्वयले विज्ञप्ति निकाल्न जरुरी छैन । उहाँहरु माग गर्ने होइन कार्यान्वयन गर्ने ठाउँमा हुनुहुन्छ । केन्द्रीय समिति बैठक पश्चात तत्काल कामहरु हुन्छन् । केन्द्रीय समितिबाटै निर्णय हुन्छ र नीति महाधिवेशन पनि हुन्छ । तर, तरिका भएन ।’

प्रवक्ता महतले इतरपक्षले जस्तो अवस्थामा पनि पार्टीभित्र आलोचना मात्र गर्ने बताए । संसदमा सबैभन्दा ठूलो पार्टी भएर पनि प्रतिपक्षमा बस्दा नेतृत्वप्रति आलोचना भएको भन्दै कांग्रेसमा जे भए पनि आलोचना हुने गरेको उनको भनाइ छ । महतले भने,‘कार्यसम्पादन समितिबाट प्रचण्डलाई प्रधानमन्त्री बनाउने भनेर निर्णय गरेको भए पनि उहाँहरुले विरोध नै गर्नुहुन्थ्यो । यत्रो ८९ सिट भएको कांग्रेसले ३२ सिट भएको प्रचण्डलाई प्रधानमन्त्री बनाउने निर्णय गर्याे भनेर पाटी घनघोर आलोचना हुन्थ्यो । अहिले विरोध गर्ने साथिहरुले राष्ट्रपति र प्रधानमन्त्री दुवै पद छोड्नुहुँदैन भनेर पछिसम्म दवाव दिनुभएको थियो ।’

उनले पार्टी सभापतिमाथि पदाधिकारीबाट आएको आरोप सत्य नभएको भन्दै बालु्वाटारमा सांसदहरुको बैठक बसेको र प्रधानमन्त्री कांग्रेसले नै लिनुपर्ने भन्दै दवाव दिएको भन्ने कुरा गलत भएको बताए । महतले अहिलेको सत्ता गठबन्धनलाई अवसरवादी भएको आरोप लगाए । गठबन्धनभित्र पदहरू मात्रै भएको तर भागवण्डा नमिलेको उनको भनाइ छ । साथै यो विशुद्ध पदपूर्ति गर्ने गठबन्धन भएको उनको आरोप थियो ।

‘अहिलेको गठबन्धन अवसरवादी हो । राजावादी, संविधानविरोधी, संघीयता विरोधी विभिन्न रूपको पार्टी मिलेर गठबन्धन बनेको छ । त्यहाँ पदमात्र छ । पदको भागवण्डा मिलेको छैन । यो विशुद्ध पदपूर्ति गर्ने गठबन्धन हो । गठबन्धनको आयु छोटिने सम्भवाना देखेका छौं,’ नेता महतले भनेका छन् । यस्तै उनले आफूहरू सशक्त प्रतिपक्षको भूमिकामा रहने पनि बताए । नेता महतले निर्वाचनअघिको कांग्रेस–माओवादी गठबन्धन कायम रहनेमा आफूहरू विश्वस्त रहेको तर पुष्पकमल दाहाल र माधव नेपालले धोका दिएको बताएका थिए ।

सरकार बनाउन छलफल भएको तर अन्तिम समयमा दाहालले छाडेर एमालेसँग गठबन्धन बनाएकोमा नेता महतले आपत्ति जनाएका थिए । उनले यसबारे विश्लेषण भइरहेको पनि बताए । साथै यसको परिणाम तथा असरबारे मूल्यांकन भइरहेको बताए । यद्यपि नेपाली कांग्रेस अहिलेको परिस्थितिबाट विचलित नभएको महतले बताएका छन् । साथै आफूहरूले वैकल्पिक समर्थन जुटाएर सरकार बनाउने प्रयास नगरेको पनि उनको भनाइ थियो ।