अर्थतन्त्रलाई गति दिने मेराे मुख्य काम हुनेछः प्रधानमन्त्री प्रचण्ड

२७ पुष, गोरखा । प्रधानमन्त्री पुष्पकमल दाहाल ‘प्रचण्ड’ले अर्थतन्त्रमा देखिएको चुनौती हल गर्न निजी क्षेत्रसँग सहकार्य आवश्यक रहेको बताएका छन् ।

नेपाल उद्योग वाणिज्य संघ गोरखाले आयोजना गरेक गोरखा महोत्सवको उद्घाटपछि सम्बोधन गर्दै उनले अर्थतन्त्रलाई गति दिन सार्वजनिक–निजी क्षेत्रको सहकार्य अनिवार्य रहेको बताए । अर्थतन्त्रलाई गति दिने मुख्य काम हुने उनले बताए ।

उनले आर्थिक विकासका चुनौती हल गर्दै सामाजिक न्यायको प्रत्याभुति, सुशासन र समृद्धि हासिल गर्न सम्मानित संसदमा समेत प्रतिबद्धता व्यक्त गरेको स्मरण गरे । अर्थतन्त्रलाई सवल बनाउन निजी क्षेत्रको योगदान महत्वपूर्ण रहने  त्यसनिम्ति सहकार्य गर्न सरकार तयार रहेको स्पष्ट पारे । उनले चुनावी प्रतिबद्धताअनुरूप विकासका लागि प्रतिवद्ध रहने समेत बताए ।

कृषिको आधुनिकीकरण, भौतिक पूर्वाधारको विकास, पर्यट, कला संस्कृतिको संरक्षण, साना घरेलु उद्योगको प्रवर्द्धन र ठूला उद्योग निर्माण र बुढीगण्डकी जलविद्युत आयोजना, बेनीघाट–आरुघाट–लार्के सडक, पालुङटार विमानस्थललगायतका ठूला आयोजना अघि बढाउँदै रोजगारी सिर्जनामार्फत गोरखा जिल्लालाई सिंगो देशको समृद्धिका लागि नमुना जिल्ला बनाउने प्रतिवद्धता पूरा गर्न लागिपर्ने उनको भनाइ थियो ।