डकुमेन्ट प्रमाणीकरण नहुँदा निराकार पाण्डेको शव नेपाल ल्याउन ढिलाइ

२८, पुष, काठमाडौं । दुई हप्ता पहिले कम्बोडियामा भएको आगलागीको घटनामा ज्यान गुमाएका झापाका निराकार पाण्डेको शव नेपाल ल्याउन ढिलाइ भएको छ । शव ल्याउन नेपालबाट आवश्यक कागजपत्र कम्बोडिया पुगिसके पनि त्यहाँको सरकारी पक्षले प्रमाणीकरणमा हेलचेक्र्याइँ गर्दा ढिलाइ भएको हो ।

एनआरएनए कम्बोडियाका अध्यक्ष लालसिंह खड्काले नेपालबाट आवश्यक कागजात पठाइसकिएको र कम्बोढिया सरकारले प्रमाणीकरण गरेपछि शव ल्याइने बताए । त्यहाँका आन्तरिक मन्त्रालयका अधिकारीले बिहीबार फाइल प्रमाणीकरण गर्ने संभावना रहेको बताइएको छ ।

फाइल प्रमाणीकरण भएपछि शव नेपाल आइपुग्न कम्तीमा ४ दिन लाग्नेछ । थाइल्याण्डको सीमा नजिकै पर्ने पोपेइ सहरस्थित ग्राण्ड डायमण्ड सिटी होटल र क्यासिनोमा भएको आगालागीमा मृत्यु भएको थियो । उनी पर्यटक भिसामा त्यहाँ पुगेका थिए ।

आगलागी हुँदै गर्दा उनले आफू बच्ने संभावना नरहेको बताउँदै आगलागी भइरहेको भवनको झ्यालमा बसेर घर परिवारलाई भिडियोमार्फत रूँदै झण्डै ४ घण्टा लामो कुराकानी गरेका थिए । अन्तिममा उनले भवनको १२औं तलाबाट हामफल्दा उनको मृत्यु भएको थियो । सरकार पक्षको लापरवाहीले पाण्डेले अनाहकमा ज्यान गुमाएको भन्दै सरकारको चर्को आलोचना भइरहेको छ ।

पाण्डेको मृत्युप्रति दुःख व्यक्त गर्दै प्रधानमन्त्री प्रचण्डले चासो दिँदै छिटो शव नेपाल ल्याउन अधिकारीहरुलाई निर्देशन दिएका थिए । शव नेपाल ल्याउन सरकारले नै खर्च व्यहोर्ने निर्णय गरिसकेको छ ।