ओलीलाई विश्वास दिलाउन नसक्दा मन्त्रिपरिषद् विस्तारमा ढिलाई

२९ पुष, काठमाडौं । प्रधानमन्त्री पुष्पकमल दाहाल प्रचण्डले सतरुढ दलको ठूलो शक्ति नेकपा एमालेका अध्यक्ष केपी शर्मा ओलीको आशंकालाई मेटाउन नसक्दा मन्त्रिपरिषद् विस्तारमा ढिलाइ हुने देखिएको छ । प्रधानमन्त्रीप्रति आशंका गर्दै ओलीले मन्त्रिपरिषद्सँगै राष्ट्रपति र सभामुखको पनि लिखित सहमति हुनुपर्ने भन्दै दावा दिएको बताइएको छ । ओलीका कारण बिहीबार बस्ने भनेको सत्तारुढ दलको बैठक पनि बस्न नसकेको बताइएको छ ।

मन्त्रिपरिषद् विस्तारलगायत विषयमा छलफल गर्न बोलाइएको सत्तारुढ गठबन्धनको बैठकमा अरु दललाई नडाकि प्रधानमन्त्री प्रचण्ड र एमालेका अध्यक्ष ओलीबीच मात्रै छलफल भएको थियो । प्रधानमन्त्री निवास बालुवाटारमा मन्त्रिपरिषद् विस्तार र सभामुख, उपसभामुख निर्वाचनलगायत विषयमा दाहाल र ओलीबीच भएको छलफलबारे बाँकी दल अनविज्ञ छन् । प्रधानमन्त्री प्रचण्डसँग छलफल र सत्तारुढ गठबन्धनको बैठकमा भाग लिन एमाले अध्यक्ष ओली बिहीबार ४ बजेतिर बालुवाटार पुगेका थिए ।

गठबन्धनको बैठक भनेर प्रचार गरिए पनि सो छलफलमा अरु दललाई बोलाइएको थिएन । प्रचण्ड र ओलीबीचको छलफल सकिएपनि मन्त्रिपरिषद विस्तारबारे केही निर्णय भएन ।   पुस २६ गते विश्वासको मत लिएका प्रधानमन्त्री दाहालले मन्त्रिपरिषद् विस्तारको तयारी गरेका थिए । तर, अहिलेसम्म सरकारमा जाने तयारीमा रहेका र सरकारमा सहभागि भइसकेका दलहरुसँग प्रधानमन्त्रीले छलफल गर्न पाएका छैनन् ।

ओलीलाई मनाउन नसकेका कारण प्रधानमन्त्री प्रचण्डले विश्वासको मत लिएलगत्तै मन्त्रिपरिषद् विस्तार गर्ने तयारीमा रहेका सत्ता साझेदार दलहरूले मन्त्रालयको बाँडफाँट नै टुंगो लगाउन सकेका छैनन् । माओवादी अध्यक्ष एवं प्रधानमन्त्री दाहाल र एमाले अध्यक्ष केपी शर्मा ओलीबीच लगातार बुधबार र बिहीबार छलफल भए पनि मन्त्रालय भागबन्डा हुन सकेन ।

चैत १० मा प्रधानमन्त्री नियुक्त भएका प्रचण्डले भोलिपल्ट शपथका दिन आठ सदस्यीय मन्त्रिपरिषद् गठन गरेका थिए । तीन उपप्रधानमन्त्रीको जिम्मेवारी त्यति बेलै तोकिएकामा चार मन्त्री अझै बिनाविभागीय छन् । मन्त्रालय संख्याभन्दा धेरै र महत्वपूर्ण मानिएकामा बढी दाबी हुनाले पनि बाँडफाँट टुंग्याउन प्रचण्डलाई सकस परेको देखिन्छ । उता ओलीले मन्त्रालय मात्रै नभई एकमुष्ठ रूपमा शक्ति बाँडफाँट गर्नुपर्ने बताइरहेका छन् ।

बालकोटमा बुधबार करिब २ घण्टा एक्लाएक्लै वार्ता गरेका प्रचण्ड र ओलीले बिहीबार पनि प्रधानमन्त्री निवास बालुवाटारमा छलफल गरेका थिए । प्रधानमन्त्री दाहाल र सत्तारूढ दलको उच्चस्तरीय राजनीतिक संयन्त्रका संयोजक ओलीबीच सहमति नभएपछि बिहीबार साझेदार दलहरूबीच औपचारिक बैठक बस्न नसकेको माओवादीका एक नेताले जानकारी दिए ।

उनका अनुसार कांग्रेसले विश्वासको मत दिएपछि झस्किएको एमालेले मन्त्रिपरिषद् विस्तारमा थप अडान लिइरहेको छ । गृह र अर्थजस्ता महत्वपूर्ण मन्त्रालय पहिला नै साझेदार दलले लगेको भन्दै प्रधानमन्त्री प्रचण्डले अब धेरै लचिलो हुन नसक्ने जनाउ दिएपछि ओली थप सशंकित भएको उनको भनाइ छ ।

यसबारे छलफल गर्न आज पनि सत्ता साझेदार दलहरूको बैठक केही बेरमा बस्दैछ । बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा ११ बजे बस्ने तय भएको एमाले अध्यक्ष केपी शर्मा ओलीका प्रेस संयोजक रामशरण बजगाईंले जानकारी दिए । आजको बैठकमा मन्त्रालयहरूको भागबन्डामा सहमति जुटाएर सकभर आजै मन्त्रिपरिषद्लाई पूर्णता दिने प्रधानमन्त्री पुष्पकमल दाहाल प्रचण्डको तयारी छ ।