माओवादी केन्द्रबाट ३ मन्त्री थपिँदै, सापकोटाले खोजे मन्त्री कोटा

२९ पुष, काठमाडौं । प्रधानमन्त्री पुष्पकमल दाहाल ‘प्रचण्ड’ले मन्त्रिमण्डल विस्तार गर्ने भएका छन् । उनले आफ्नो पार्टीबाट सांसद महिन्द्र राय यादव, रेखा शर्मा र सुदन किरातीलाई मन्त्री बनाउने तयारी गरेका छन् ।

सांसद यादव माओवादी केन्द्रको चुनाव चिन्हबाट चुनाव लडेका थिए । उनी बाबुराम भट्टराई नेतृत्वको समाजवादी पार्टी नेपालका नेता हुन् ।

सत्तारुढ दलहरुबीच माओवादी केन्द्रबाट मन्त्रिपरिषदमा ५ जना रहने समझदारी छ । यसअघि माओवादीबाट वरिष्ठ उपाध्यक्ष नारायणकाजी श्रेष्ठ उपप्रधानमन्त्री र भौतिक पूर्वाधार मन्त्री बनिसकेका छन् ।

यता पार्टीका प्रभाशाली नेता पूर्वसभामुख अग्निप्रसाद सापकोटाले आफ्ना भितजालाई मन्त्री बनाउन दबाब दिएको स्रोतले जनाएको छ । सापकोटाले सिन्धुपाल्चोकबाट निर्वाचित सांसद माधव सापकोटालाई मन्त्री बनाउन दबाव दिएका हुन् । माधवलाई मन्त्री नबनाए आफूलाई उपराष्ट्रपति बनाउनुपर्ने अडान राखेको निकटस्थ नेताहरु बताउँछन् । भट्टराई पुत्री मानुषी काठमाडौं ७ बाट चुनावमा पराजित भएपछि रायलाई मन्त्री बन्ने अवसर प्राप्त हुने भएको छ ।

गएको आमनिर्वाचनमा उनी र कृष्णबहादुर महराले टिकट लिएका थिएनन् । सापकाेटा र महरा सशस्त्र द्वन्द्वकालदेखिकै प्रचण्डका विश्वास पत्र हुन् । साेपकाेटाविरूद्ध द्वन्द्वकालमा काभ्रेका अर्जुन लामालाइ जिउँदै जलाएर ‘हत्या’ गरेकाे आराेप छ ।

शुक्रबार सत्ता गठबन्धन दलबीच मन्त्रालयको भागवण्डाटुंगो लगाएर शनिबार वा आइतबारसम्म मन्त्रिपरिषदलाई पूर्णता दिने प्रयास रहेको बताइएको छ ।