घनश्याम भुसालद्वारा एकीकृत समाजवादीमा प्रवेश

२९ पुष, काठमाडौं । नेकपा (एमाले) परित्याग गरी स्वतन्त्र बनेका वामपन्थी नेता घनश्याम भुसाल नेकपा (एकीकृत समाजवादी)मा प्रवेश गरेका छन् ।

उनले काठमाडौंमा शुक्रबार पत्रकार सम्मेलन गरेर माधवकुमार नेपाल नेतृत्वको एकीकृत समाजवादी पार्टीमा प्रवेश गरेको स्वघोषणा गरे । एकीकृत समाजवादी सैद्धान्तिक वैचारिक रूपमा तत्कालीन नेकपाको उत्तराधिकारी रहेकाले आफूले यो पार्टी रोज्नुपरेको उनले बताए । उनलाइ अध्यक्ष नेपाल, नेता झलनाथ खनाल लगायतले स्वागत गरेका थिए ।

भुसाल गत मंसिर ४ मा सम्पन्न निर्वाचनमा एमालेबाट टिकट नपाएपछि रुपन्देही १ बाट प्रतिनिधिसभा सदस्यमा स्वतन्त्र उम्मेदवार उठेका थिए । तर एमालेका सचिव समेत रहेका छविलाल विश्वकर्मासँग पराजित भए । त्यसपछि उनी गुमनाम जस्तै बने ।

यसअघि एकीकृत समाजवादीमा प्रवेशका लागि उनले ५ बुँदे प्रस्ताव राखेका थिए । भुसालको प्रस्तावलाई एकीकृत समाजवादीले स्वागत गरेपछि उनी शुक्रबार पार्टी प्रवेश गरेका हुन् ।

पार्टी प्रवेश कार्यक्रममा उनले तत्कालीन नेकपा विभाजनका कारक एमालेका अध्यक्ष केपी शर्मा ओलीको दम्भ र अहंकारी चरित्र रहेको बताए । एकीकृत समाजवादीमा रहेर त्यस व्यक्तिवादी चरित्रलाई थप मेटाउँदै देश र जनताको पक्षमा भूमिका खेल्ने बताए ।

ओलीकै कारण पार्टी सिद्धान्त र पार्टी संगठन संकटमा परेको भन्दै बहुदलीय जनवादकै हुर्मत लिएको उनको भनाइ छ ।