रामेछापका सबै क्रसर र बालुवा प्रशोधन उद्योग बन्द

२७ पुष, मन्थली । रामेछाप जिल्लाभित्रका संचालित सबै क्रसर उद्योग तत्कालका लागि बन्द भएका छन् । गृह मन्त्रालयको निर्देशन अनुसार जिल्ला प्रशासन कार्यालय रामेछापले सबै क्रसर उद्योग बन्द गराएको हो ।

गृह मन्त्रालयको निर्देशन अनुसार हाललाई जिल्ला भित्रका सबै क्रसर उद्योग र बालुवा प्रशोधन उद्योग बन्द गराएको जिल्ला प्रमुख अधिकारी शोभाकर रेग्मीले बताए । मापदण्ड विपरीतका क्रसर उद्योग अब सञ्चालन हुन नसक्ने उनले बताए ।

रामेछाप जिल्लाभित्र हाल क्रसर र वालुवा प्रशोधन गरी २१ वटा उद्योग दर्ता गरिएको तथ्याङक छ । जिल्ला समन्वय समितिसहितको टोलीले अनुगमन गरेपछि मात्र सञ्चालन गर्न दिने वा बन्दलाई नै निरन्तरता दिने भन्ने टुंगो लाग्ने प्रजिअ रेग्मीको भनाइ छ ।

जिल्ला प्रहरी कार्यालय रामेछापका डिएसपी होमबहादुर पराजुलीले बन्द गरिएका क्रसर उद्योग सञ्चालन गर्ने विषय जिल्ला समन्वय समितिका पदाधिकारीसहितको टोलीले अनुगमन गरेपछि मात्र टुंगो लाग्ने बताए ।