निर्मला कुर्मीलाई न्याय दिलाउन कुनै कसर बाँकी नराख्ने गृहमन्त्रीको आश्वासन

३० पुष, काठमाडौं । उपप्रधानमन्त्री तथा गृहमन्त्री रवि लामिछानेले बाँकेकी बेपत्ता निर्मला कुर्मीलाई न्यायन दिलाउन कुनै कसर बाँकी नराख्ने बताएका छन् ।

कुर्मीको न्यायका लागि माइतीघर मण्डलामा धर्नामा बसिरहेका पीडित र अधिकारकर्मीसँग भेट गरी गृहमन्त्री लामिछानेले यस्तो आश्वसन दिएका छन् । धर्ना तथा संघर्षकाे नेतृत्व गर्दै आइरहेकी रुबी खानसँग उनले कुर्मी बेपत्ता प्रकरणमा न्याय गर्न नसक्ने अवस्था भए र त्यसमा कुनै कैफियत देखिए पदबाट राजीनामा दिने समेत बताएका छन् ।

कुर्मीको अपहरणपछि हत्या भएको बताउँदै उनीहरु तेस्रो चरणमा काठमाडौंको माइतीघर मण्डलामा १७ दिनदेखि अनिश्चितकलीन धर्ना दिइरहेका छन् ।

कुर्मीको मुद्दाको गहिरो अनुसन्धान गरी दोषीलाई कानूनी कारवाहीमा ल्याउन धर्नाकारीहरुले लामिछानेसँग आग्रह गरे । न्याय नमिलेसम्म काठमाडौंमा नछाडने रुबी खानले बताइन् ।