समानुपातिक सांसद नन्दा गुरुङ कर्णाली प्रदेशको सभामुखमा निर्वाचित

१ माघ, सुर्खेत । सुर्खेतबाट निर्वाचित नेकपा (एमाले)की प्रदेश सांसद नन्दा गुरुङ कर्णाली प्रदेशको सभामुख निर्वाचित भएकी छन् । आइतबार भएको प्रदेशसभा सभामुखको निर्वाचनमा गुरुङले निकटतम प्रतिद्वन्द्वीभन्दा १० मतले विजयी भएकी छन् । उनले २४ मत प्राप्त गरेर सभामुखमा निर्वाचित भइन् ।

उनका निकटतम प्रतिद्वन्द्वी नेपाली कांग्रेसका खड्गबहादुर पोखरेलले १४ मत प्राप्त गरे । उनलाई कांग्रेसको मात्रै मत प्राप्त भएको हो । एमालेकी गुरुङलाई एमालेको १०, नेकपा (माओवादी केन्द्र)को १३, र राप्रपा वा नेकपा (एकीकृत समाजवादी)को १ मत प्राप्त भएको छ । ४९ सदस्यीय सभामा ३८ जनाले भाग लिएका थिए। गुरुङ समानुपातिक कोटाबाट सांसद बनेकी हुन् ।

सत्तारुढ गठबन्धनको केन्द्रीय समीकरणले कर्णालीमा मुख्यमन्त्री माओवादी केन्द्र र सभामुख एमालेलाई भाग लगाएको थियो । सोही अनुसार एमालेले यो पटक महिला सांसदलाई सभामुखमा अघि सारेको हो । गुरुङ कर्णालीको दोस्रो सभामुख बनेकी हुन् । यसअघि दैलेखका एमालेकै राजबहादुर शाही प्रदेशको पहिलो सभामुख बनेका थिए ।