चोभारमा कार खसेर बेपत्ता पुरूषको शव फेला

५ माघ, काठमाडौं । चोभारको पुलबाट बागमती नदीमा कार खस्दा बेपत्ता भएका पुरूषको शव ३ दिनपछि फेला परेको छ।

कार खसेको स्थानभन्दा अन्दाजी सय मिटर तल पुरूषको शव फेला परेको जिल्ला प्रहरी परिसरले जनाएको छ । दक्षिणकाली नगरपालिका(१ चाल्नाखेल बस्ने ४७ वर्षीय राजकुमार खत्रीको शव फेला परेको हो । कारमा सवार उनकी श्रीमती अम्बिका लामिछानेको भने जीवितै उद्धार गरिएको थियो ।

सोमबार साँझ बा ५ च ५६५४ नम्बरको कार खसेको थियो । उक्त कार सिसिटिभी फुटेजमा खोकना फास्ट ट्र्याक तर्फबाट मुख्य सडकमा निस्किने क्रममा पुलमाथिबाट बागमती नदी किनारमा खसेको देखिन्छ । राजकुमारको खोजीका प्रहरीले र्‍याफ्टिङ, गोताखोरको सहायता लिएको थियो ।