सादा पोशाकमा प्रहरी परिचालनबारे मापदण्ड बनाइने

६ माघ, काठमाडौं । गृह मन्त्रालयले सादा पोशाकमा प्रहरी परिचालन गर्न मापदण्ड बनाउने भएको छ ।

यसनिम्ति प्रहरीका प्रवक्ता प्रहरी नयाब महानिरीक्षक (डीआईजी) टेकप्रसाद राईको नेतृत्वमा बनेको सादा पोशाकका प्रहरी परिचालन सम्बन्धी मापदण्ड बनाउन अध्ययन कार्यदलले प्रतिवेदन बुझाइसकेको छ ।

प्रतिवेदनले सादा पोशाकमा खटाइएका प्रहरीबाट गैरव्यवसायिक गतिविधि बढेको र बढीमा चार वर्षसम्म मात्र राख्न सुझाइएको छ । हाल प्रदेश, जिल्ला र इलाका प्रहरी कार्यालयले आश्यकता अनुसार आफैं सादा पोशाकमा प्रहरी परिचालन गर्दै आएको छ ।

यस्तै, उपप्रधान एवं गृहमन्त्री रवि लामिछानेले नेपाल प्रहरीसँग घुमुवा प्रहरीको विवरण मागे पनि हालसम्म प्रहरी प्रधान कार्यालय, नक्सालले बुझाएको छैन । मन्त्रालयले १८ पुसको मन्त्रीस्तरीय निर्णय भन्दै घुमुवा प्रहरीको विवरण उपलब्ध गराउन भनेको थियो । प्रहरी प्रधान कार्यालयबाट घुमुवा प्रहरीको विवरण पेश गर्न ढिलाई गरेको हो ।

अपराध अनुसन्धान र नियन्त्रणका लागि गोप्य सूचना संकलन गर्ने उद्देश्यले प्रहरीका विभिन्न युनिटमा सादा पोशाकका प्रहरी (घुमुवा) परिचालन गर्ने गरिन्छ ।

तर, लामो समयदेखि एउटै प्रहरीलाई सादा पोशाकमा राखेर सूचना संकलनमा खटाउँदा बढी मात्रामा हप्ता असूलीमा सक्रिय गराइएको भन्दै आलोचन हुँदै आएको छ । तर, घुमुवा प्रहरी उद्देश्य अनुरुपको काममा परिचालन हुन सकेको गृहको निस्कर्ष छ ।