गृहमन्त्रीकाे विरोधमा जनकपुरमा प्रदर्शन

९ माघ, जनकपुरधाम । जनकपुरधामका दुई युवकको अपहरणपछि भारतमा हत्यालाई लिएर स्थानीयले गृहमन्त्रीको विरोधमा प्रदर्शन गरेका छन आन्दोलित भएका छन् ।

आन्दोलित मृतकका परिवारजन र स्थानीयले आइतबार जनकपुरधाम उपमहानगरपालिका–९ पिडारी चोकमा प्रदर्शन गरी चक्का गर्दै गृहमन्त्री रबि लामिछानेकाे राजीनामाकाे माग गरेका हुन् । प्रहरी प्रशासनको कमजोरी र लापरवाहीले युवकद्वयको हत्या भएको उनीहरुको आरोप छ ।

उनीहरुले जनकपुरधामका युवकद्वय विष्णु साह र रोहित साहको हत्याका फरार हत्यारालाई अनुसन्धानको दायरामा ल्याई कडा कारवाही गर्न स्थानीय प्रशासनसँग स्थानीयले माग गरे ।

पीडित परिवारले अपहरणकारीको फोन आउँदा आफूहरुले उसको कल रेकर्ड तुरुन्त प्रहरीलाई पठाउने गरे पनि हत्या घटनापछि प्रहरीले झुटो बोलेर घटनालाई मोड्न खोजेको आरोप लगाए ।

जनकपुरधाम उपमहानगरपालिका वडा नम्बर–८ बस्ने जगदीश साहका २२ वर्षीय छोरा रोहित र वडा नम्बर(१३ बस्ने रामबाबु साहका २५ वर्षीय छोरा विष्णु साहको भारतको बिहार राज्यस्थित परिहार पर्सा गाउँमा हत्या गरिएको अवस्थामा मृत फेला परेका थिए ।

दुईसाता अघि दुवैजना भारतको सितामढी जिल्लाको बेला परिहार बस्ने आफ्ना आफन्तको घर गएका बेला अपहरणमा परेका थिए ।

बेपत्ता भएका दुबैजनाको परिवारलाई अपरहरणकारीले गत सोमबारसम्म भारतीय नम्बरबाट फोन गरी ५० लाख रुपैयाँ फिरौती मागेको थियो । हत्यामा संलग्नताको आरोपमा प्रहरीले अहिलेसम्म नेपाल र भारतका गरी ९ जनालाई पक्राउ गरेको छ ।