निहारिकाले जिल्ला अदालतमा दिइन् श्रीमान शिवराजविरुद्ध अंश मुद्दा

१६ माघ, काठमाडौं । निहारिका राजपूत भनिने सोनालीकुमारी सिंहले श्रीमान विरुद्ध अंश मुद्दा दायर गरेकी छन् । आइतबार निहारिकाले धनुषा जिल्ला अदालतमा अंश मुद्दा दिएकी हुन् ।

धनुषा जिल्ला अदालतका श्रेष्तेदार विकास बस्नेतका अनुसार निहारिकाले आइतबार मात्रै आफ्ना श्रीमान शिवराज श्रेष्ठले हेरविचार नगरेको भन्दै अंश लिन मुद्दा दर्ता गराएकी हुन् ।

निहारिकाले दर्ता गराएको मुद्दामा श्रीमान् श्रेष्ठले मदिरा सेवन गरी कुटपिट गर्ने गरेको र आफ्नो हेरचाह नगरेको आरोप लगाएकी छिन् ।
उनले धनुषा जिल्ला अदालतमा ०७९CP१९७९ बाट अंश मुद्दा दर्ता गराएकी हुन् । आरोपित शिवराज श्रेष्ठले सोमबार प्रतिउत्तर दिने तयारी गरेका छन् ।

यसअघि निहारिकाबाट जन्म भएका छोराको डीएनए शिवराजसँग मेल खाएपछि दुवै जना श्रीमान श्रीमतीको रुपमा बस्ने सहमत भएका थिए । तर शिवराले श्रीमानको भूमिका ननिभाएको र हेरचाहमा समेत बेवास्ता गरेपछि उनले ताना कायम गराउने उद्देश्यले अंश मुद्द दर्ता गराएको हुन सक्ने चर्चा छ । उनीहरु दुवैबीच प्रेमी–प्रेमिका रहेकै समयमा यौनसम्बन्ध हुँदा सोनाली गर्भवती भएपछि उनीहरुबीच मनमुटाव भएको थियो ।

शिवराज निहारिकालाई विवाह गरेर घर लैजान तयार नदेखिएपछि निहारिकाले धनुषा जिल्ला अदालतमा जबरजस्ती करणीको मुद्दा दर्ता गराएकी थिइन् । सोही मुद्दामा शिवराजले सफाइ पाएका थिए ।

तर निहारिका उच्च अदालत जनकपुर पुगिन् । पुनरावेदन अदालतले फैसला दिन ढिलाई गरेको भन्दै निहारिका काठमाडौं आएर धर्ना समेत बसेकी थिइन् । सोही क्रममा उनले राष्ट्रपति विद्यादेवी भण्डारीको कार्यालय शितलनिवास अगाडि पुगेर शरीरमा पेट्रोल खन्याएर आत्मदाहकोा प्रयास समेत गरेकी थिइन् । त्यसपछि सरकारले उनको मागलाई सम्बोधन गर्न डीएनए परीक्षणको प्रबन्ध मिलाउन सरकारी वकिलको कार्यालयलाई भनेको थियो ।

बच्चा र शिवराजको डीएनएन परीक्षणको अनुमति पाएको थियो । परीक्षणमा डीएनए म्याच भएको थियो ।उच्च अदालत जनकपुरमा निहारिका र शिवराज श्रेष्ठको बलात्कार सम्बन्धी मुद्दा विचाराधीन अवस्थामै छ ।