सन्दीप लामिछानेलाई थुनामै राख्नुपर्ने मागसहित सर्वोच्चमा रिट दर्ता

१७ माघ, काठमाडौं । एक नाबालिगलाई बलात्कार गरेको मुद्दामा क्रिकेटर सन्दिप लामिछानेलाई उच्च अदालत पाटनले मुद्दा पुर्पक्षको लागि धरौटीमा छाड्न दिएको आदेश बदरको माग गर्दै सर्वोच्च अदालतमा रिट निवेदन दर्ता गरेको छ ।

पुर्पक्षको लागि धरौटीमा छोड्ने उच्च अदालतको आदेश बदर गर्न माग गर्दै महान्यायाधिवक्ता कार्यालयले आज सर्वोच्चमा रिट निवेदन दायर गराएको हो ।

सन्दिप लामिछानेलाई धरौटीमा छोड्ने उच्च अदालत पाटनको आदेश कानुनी व्यवस्था र सर्वोच्चले यसअघि गरेको यस्तै प्रकृतिका मुद्दामा थुनछेकबारे गरेको व्याख्याको प्रतिकुल रहेको आधारसहित रिट दायर गराएको महान्यायाधिवक्ता कार्यालयका प्रवक्ता सन्जीवराज रेग्मीले बबाए ।

उनले लामिछानेलाई जिल्ला अदालत काठमाडौंले दिएको आदेशअनुसार बमोजिम नै थुनामा राखेर मुद्दाको पुर्पक्ष गर्नुपर्ने माग रिटमा गरिएको बताए ।

काठमाडौं जिल्ला अदालतले थुनामा पठाउन यसअघि दिएको आदेशविरुद्ध सन्दिप उच्च अदालत पुगेका थिए । त्यसमा उच्चले थुनामुक्त रहेर मुद्दा लड्न सकिने भन्दै दुई हप्ताअघि लामिछानेलाई २० लाख रुपैयाँ धरौटी लिएर शर्तसहित थुनामुक्त गरेको थियो ।