शिवराजले हेरचाह र पालनपोषणको जिम्मा लिएपछि निहारिकाले लिइन् मुद्दा फिर्ता

१७ माघ, काठमाडौं । आफूमाथि बलात्कार गरेर बच्चा जन्मिएको तर जिल्ला अदालतले सफाइ दिएको भन्दै कारबाहीका लागि उच्च अदालतमा पुनरावेदनको मुद्दा लडिरहेकी निहारिका राजपूत भनिने सोनाली सिंंह ठकुरी र शिवराज श्रेष्ठबीच पति पत्नीको रुपमा मिलापत्र भएको छ ।

यसअघि घरायसीमा तवरमा पति पत्नीको रुपमा बस्दै आएपनि अढाई वर्षकाे छोरा विआन र आफूलाई हेरचाह र पाालनपोण नगरेको भन्दै धनुषा जिल्ला अदालतमा अंश मुद्दा दर्ता गराएकी थिइन् ।

दताएपछि भएको छलफलमा दुवै जना पति पत्नी भएर बस्न तयार भएपछि निहारिकाले अंश मुद्दा फिर्ता लिएकी हुन् । उनीहरुबीच सोमबार मिलापत्र भएपछि जिल्ला न्यायाधीश ब्रजेश प्याकुरेलको इजलासले मुद्दा मिलापत्रमा टुंगिएको र मुद्दा दर्ताको अदालती शुल्कमा २५ प्रतिशत कट्टा गरी वादी निहारिकालाई ७५० रुपैयाँ फिर्ता गर्न आदेश दिएको थियो ।
सुरुमा निहारिकाले शिवराजविरुद्ध जिल्ला अदालत धनुषामा दायर गरेको बलात्कारको मुद्दामा दुई जनाबीच प्रेमसम्बन्ध रहेको र प्रेमसम्बन्धमा समयमा भएको शारीरिक सम्बन्धलाई जबरजस्ती करणी भनी मान्न नमिल्ने भन्दै शिवराजलाई सफाइ दिएको थियो ।

उक्त आदेश बदरको माग गर्दै उच्च अदालत जनकपुरमा रिट हालेकी थिइन् । जुन विचराधीन अवस्थामा छ । मिलापत्रसँगै उनीहरुबीच दाम्पत्य सम्बन्ध कायम भएको छ । यसअघिसम्म शिवराजले बच्चा आफूबाट जन्म नभएको जिकिर गर्दै आएका थिए । पछि निहारिकाले बच्चा र शिवराजको डीएनए परीक्षणको माग गर्दै काठमाडौंमा आएर धर्ना बसेकी थिइन् । धर्नापछि पनि माग सुनुवाई नभएको भन्दै उनले आत्मदाहको प्रयास गरिन् ।

त्यस घटनापछि सरकारले डीएनए परीक्षणको व्यवस्था मिलाउन सरकारी वकिलको कार्यालयलाई निर्देशन दियो । निर्देशनपछि गरिएको परीक्षणमा बच्चा विआन र शिवराजको डीएनए मिलेको थियो । त्यसपछि पनि शिवराजले श्रीमती र बच्चालाई हेरचाह गर्न छाडेपछि निहारिका अंश पाउन मुद्दा लिएर जिल्ला अदालत पुगेकी हुन् ।

निहारिकाको माइत महोत्तरीको जलेश्वर नगरपालिका–९ हो भने शिवराज धनुषाको क्षिरेश्वरनाथ नगरपालिका–३ का हुन् । दुवै जनाको उमेर २३ वर्ष रहेको छ । छोरा विआनको जन्म २०७७ भदौ ५ मा भएको थियो ।