ए डिभिजन लिगको तयारी गर्न एन्फाले दियो १४ क्लबलाई १५/१५ लाख रुपैयाँ

२० माघ, काठमाडौं । अखिल नेपाल फुटबल संघ (एन्फा)ले शहिद स्मारक ए डिभिजन लिग फुटबलको आयोजनामा सहगिता जनाउन तयारीका लागि १४ क्लबलाई रकम निकासा गरेको छ । एन्फाको आयोजनामा लिग फुटबल प्रतियोगिता हुँदैछ ।

एन्फाका अनुसार लिगका लागि सहभागी हुन १४ वटा क्लबले क्लब दर्ता गराएका छन् । जसअनुसार एन्फाले लिगको तयारी खर्चस्वरुप हरेक क्लबलाई प्रमथ किस्ता रु १५ लाख रुपैयाँका दरले रकम निकासा गरिएको छ ।

क्लबहरुलाई खेलाडी दर्ताको लागि यही माघ २९ गतेसम्मको मिति तय गरिएको पनि जनाइएको छ । फागुन १९ गतेदेखि हुने लिगमा डबल राउन्ड रोबिनको आधारमा १८२ खेलहरु खेलाइनेछ । ती खेलहरु दशरथ रंगशाला, च्यासल खेल मैदान र एन्फा कम्प्लेक्सस्थित खेल मैदानमा संचालन गरिनेछ ।

लिगमा प्रथम हुने टिमले नगद रु ७५ लाख, द्धितीय हुनेले रु ५० लाख र तृतीय हुनेले रु २५ लाख पुरस्कार स्वरुप पाउने छन् । यस्तै लिगमा एक क्लबले फेयर प्ले अर्वाड स्वरुप रु तीन लाख पुरस्कार उपलब्ध गराइनेछ । प्रतियोगितको सर्वोत्कृष्ट खेलाडीलाई रु तीन लाख पुरस्कार दिइनेछ ।

त्यस्तै उत्कृष्ट गोलकिपर र उच्च गोलकर्तालाई समान रु दुइ–दुइ लाख पुरस्कार उपलब्ध गराइने छ। लिगको एक उदयमान खेलाडीलाई इर्मजिङ्ग प्लेयर घोषणा गरेर नगद रु एक लाख पचास हजार दिइने पनि एन्फाले जनाएको छ ।

हरेक खेलको विजेता टोलीलाई थप नगद रु ५०,००० पुरस्कार पनि दिइनेछ। खेल बराबरी भएको खण्डमा दुवै टोलीलाई समान रु २५,००० दिइने छ । हरेक खेलको उत्कृष्ट खेलाडीलाई प्लेयर अफ द म्याच स्वरुप रु १०,००० प्रदान गरिनेछ । शहिद स्मारक ए डिभिजन लिगको अनुमानित लागत करिब रु १२ करोड लाग्ने अनुमान गरिएको छ ।