रेशम चौधरीसहित ९ जनाकाे मुद्दामा मोक्तान र शर्माको इजलासमा सुनुवाइ हुँदै

२२ माघ, काठमाडौं । कैलालीको टीकापुरमा २०७२ भदौ ७ मा भएकाे घटनामा दोषी ठहर भएर सर्वस्वसहित जन्मकैदको सजाय भुक्तान गरिरहेका कैलालीका रेशमलाल चौधरीको मुद्दा न्यायाधीशद्वय टंकबहादुर मोक्तान र मनोज शर्माको इजलासमा पेसी तोकिएको छ। थुनुवा १० नम्बरमा चौधरीको मुद्दा पेसी रहेको छ ।

यसअघि पेसी तोकिए पनि सर्वोच्चबाटै पटकपटक स्थगित हुँदै आएको थियो ।२०७७ फागुन १२ गते जिल्ला अदालत कैलाली र उच्च अदालतको फैसला त्रुटीपूर्ण भएको भन्दै चौधरीका तर्फबाट पूनरावेदन गरिएको थियो । उक्त पुनरावेदनमा हालसम्म एकपटक पनि सुनुवाइ हुन सकेको छैन ।

दुईपटक हेर्न नभ्याइने र एकपटक हेर्न नमिल्ने हुँदै मुद्दा स्थगित भयो । अन्तिम पटक २०७९ भदौ २६ गते न्यायाधीशद्वय विश्वभरप्रसाद श्रेष्ठ र सुष्मालता माथेमाको इजलासमा पेसी तोकिएको थियो । उनीहरुको इजलासमा हेर्न नमिल्ने भएपछि पेसी सरेको थियो ।

वर्तमा संविधान जारी गर्ने बेला प्रदेश सीमांकनपछि थरुहट प्रदेशको माग गर्दै भएको आन्दोलनमा २०७२ भदौ ७ गते नेपाल प्रहरीका वरिष्ठ प्रहरी (एसएसपी) उपरीक्षक लक्ष्मण न्यौपानेसहित ७ सुरक्षाकर्मी र एक नाबालकको हत्या भएको थियो ।

उक्त घटनामा रेशम चौधरीसहित ११ जनालाई कर्तव्य ज्यान, डाँका चोरी तथा ज्यान मार्ने उद्योग कसुरमा दोषी ठहर गर्दै २०७५ फागुन १२ गते कैलाली जिल्ला अदालतले कैद सजायको फैसला सुनाएको थियो ।

त्यसको दुई वर्षपछि फैसलाविरुद्ध परेको रिटमा करिब २०७७ साल पुस ३ गते उच्च अदालत दिपायलले रेशम चौधरीसहित ८ जनाको जन्मकैद फैसला सदर गरेको थियो ।