साफ यू-२० महिला च्याम्पियनसिप : नेपालले आज भारतसँग खेल्दै

२४ माघ, काठमाडौं । बंगलादेशको ढाकामा जारी साफ यू-२० महिला च्याम्पियनसिप अन्तर्गत लिगमा नेपालले आज आफ्नो अन्तिम खेल खेल्दैछ । ढाकास्थित बिएसएसएस मोस्ताफा कमल स्टेडियममा नेपाली समय अनुसार दिउँसो पौने ३ बजे सुरु हुने खेलमा नेपालले भारतसँग खेल्दैछ ।

दुवै टोलीका लागि फाइनलमा स्थान बनाउन यो खेल महत्वपूर्ण छ । त्यसमा पनि नेपालका लागि त फाइनलमा स्थान बनाउन भारतलाई जित्नै पर्ने अवस्था छ । ४ राष्ट्र सहभागी च्याम्पियनसिपमा भारत एक जित र एक बराबरीबाट ४ अंक जोड्दै शीर्ष स्थानमा छ । उति नै अंक भएको घरेलु टोली बंगलादेश गोल अन्तरमा पछि रहेर दोस्रोमा छ ।

एक हार र एक जितबाट नेपालको तीन अंक छ र तेस्रो स्थानमा छ । नेपाल पहिलो खेलमै घरेलु टोली बंगलादेशसँग ३–१ ले पराजित भएको थियो । दोस्रो खेलमा भुटानलाई ४(० ले हराएको थियो । खेलमा भारतसँग हारेको खण्डमा नेवाल खेलबाटै बाहिरिनेछ । भारत पनि यही अवस्थामा रहेकाले खेल निकै रोमाञ्चक हुने अनुमान गरिएको छ ।

नेपालका प्रशिक्षक यामबहादुर गुरुङले भारत बलियो टिम भएपनि नेपालले जित निकाल्ने गरी तयाी गरेको बताए । भारतीय टिमका प्रशिक्षक मायमोल रकीले पनि आजको खेलमा नेपाललाई जित्न निकै मेहनत गर्नुपर्ने अवस्था रहेको बताए ।