सभापति देउवाविरूद्धकाे रिट सर्वोच्चमा दर्ता

२४ माघ , काठमाडौँ । नेपाली कांग्रेसका सभापति शेरबहादुर देउवालाई संसदमा प्रमुख विपक्षी दलको नेता नबनाउन माग गरिएको रिट सर्वोच्च अदालतले दर्ता गरेको छ ।

यसअघि सर्वोच्च प्रशासनले रिटमा उठाएको विषय संघीय सचिवालयको क्षेत्रधिकारभित्र पर्ने भन्दै दर्ता गर्न नमानेको रिट निवदेनलाई न्यायाधीश सपना प्रधान मल्लको इजलासले देउवाविरुद्धको उक्त रिट दर्ता गर्न मंगलबार आदेश दिएको हो ।

रिट निवेदन लिएर अधिवक्ता विमलप्रसाद सर्वोच्च पुगेका थिए । रिट दर्ता गर्न अस्वीकार गरेपछि त्यसविरुद्ध पौडेलले निवेदन दिएका थिए । मंगलबार भएको दर्ताको आदशेसँगै अब रिट निवदेनमाथि सुनुवाइ हुनेछ । बुधबारका लागि सुनुवाइ पेशी तोक्न समेत आदेश भएको रिट निवेदक पौडेलले बताए ।

रिटमा नेपाली कांग्रेसले प्रधानमन्त्री प्रचण्डलाई सरकार गठनमा विश्वासको मत दिएर विपक्षी दलको हैसियत गुमाएकाले सभापति देउवालाई विपक्षी दलको नेता बनाउने निर्णय बदर गर्न र संवैधानिक परिषदको बैठकमा उपस्थित हुन रोक लगाउन माग गरिएको छ ।

तर यसअघि नै संघीय संसद सचिलायले कांग्रेस संसदीय दलका नेता देउवालाई नै प्रमु्ख विपक्षी दलको प्रमुख नेताको सेवा सुविधा, सुरक्षा र कार्यालय पनि उपलब्ध गराउने निर्णय गरिसकेको अवस्था छ।