६ वर्षीया बालिकाकाे हत्यामा साहलाई जन्मकैदको फैसला

२४ माघ,  महोत्तरी । जिल्ला अदालतले एक बालिकाकाे अपहरणपछि बलात्कार गरेर हत्या गरेकाे कसुर मुद्दामा  कसुरदारलाई जन्मकैदको फैसला सुनाएको छ ।

महोत्तरी जिल्लाको बर्दिबास नगरपालिका–१४ सुगमबस्तीमा दुई वर्षअघि एक ६ वर्षीया बालिकाको अपहरण तथा जबर्जस्ती करणीपछि हत्या गरेको आरोपमा स्थानीय अरुणकुमार साहलाई जन्मकैदको फैसला सुनाएको हो ।

महोत्तरी जिल्ला अदालतका स्रेस्तेदार मदन जयसवालका अनुसार अदालतका न्यायाधीश रामचन्द्र खड्काको इजलासले अपहरण, जबर्जस्ती करणी र कर्तव्य ज्यान मुद्दामा निज साहलाई जन्मकैदको सजाय सुनाएको हो । साथै पीडित परिवारलाई रू एक लाख क्षतिपूर्तिसमेत दिनुपर्ने फैसला भएकाे छ ।

२०७७ मंसिर ७ गते आइतबारका दिन अरुणले छिमेकी सादिम आलमकी ६ वर्षीया छोरी गुलाबसा खातुनलाई अपहरण गरी बेपत्ता बनाएका थिए । पछि जबर्जस्ती करणी गरेको र घटना बाहिरिने डरले घाँटी थिचेर हत्या गरी बोरामा राखेर फालिदिएको प्रमाणित भएको हो । बालिकाको शव मंसिर ८ गते सोमबार राति सोही बस्तीमा फेला परेको थियो ।

पीडित परिवारलाई न्याय दिलाउन घटनाको उच्चस्तरीय छानबिन हुनुपर्ने र दोषीलाई कडाभन्दा कडा कारबाहीको माग गर्दै स्थानीयले प्रशासनविरुद्ध आन्दोलन भएको थियो । आन्दोलनको क्रममा प्रहरीको गोली लागी बर्दिबास–१ बस्ने सञ्जय भनिने बुद्धिराज न्यौपानेको मृत्यु भएको थियो । साहकाे घरमा आगजनी समेत गरिएकाे थियाे ।

सोही घटनाको महोत्तरी जिल्ला अदालतमा विचराधीन मुद्दामा सोमबार भएको अन्तिम सुनुवाइमा दोषी साहलाई अदालतले दोषी ठहर गर्दै कैद फैसला गरेको हो ।