साफ यू-२० महिला च्याम्पियनसिपः भारतलाई हराउँदै नेपाल फाइनल प्रवेश

२४ माघ, काठमाडौं । बंगलादेमा जारी साफ यू–२० महिला च्याम्पियनसिपमा नेपालले भारतलाई हराएको छ ।

ढाकास्थित बीएसएसएस मोस्ताफा कमल स्टेडियममा मंगलबार भएको लिग चरणको आफ्नो अन्तिम खेलमा नेपालले उत्कृष्ट प्रदर्शन गर्दै भारतलाई ३–१ गोल अन्तरले पराजित गरेको हो ।

योसँगै नेपाल फाइनल प्रवेश भएको छ । अब बंगलदेश र भुटानबीचकाे प्रतिस्पर्धाबाट विजयी हुने मुलुकसँग नेपालले खेल्नेछ ।

खेलको पहिलो हाफको २१औं मिनेटमा अपुर्व नाजारीले गोल गर्दै भारतलाई अग्रता दिलाएकी थिइन् । तर दोस्रो हाफको सुरुवार्त ४७औं मिनेटमा अन्जली चन्दले नेपालका लागि बराबरी गोल गर्दै खेलमा फर्काइन् ।

कप्तान प्रिती राईले ६८औं मिनेटमा पेनाल्टी मार्फत गोल गर्दै नेपाललाई २–१ को अग्रता दिलाइन् । अग्रता बनाएपछि भारतमाथि हावी भएको नेपालका लागि अमिसा कार्कीले ८९औं मिनेटमा गोल गरेकी थिइन् ।
पहिलो खेलमा बंगलादेशसँग ३–१ ले पराजित भएको नेपालले दोस्रो खेलमा भुटानलाई ४–० ले पराजित गरेको थियो ।

नेपालले तीन खेलबाट दुई जित र एक हार सहित ६ अंक जोडेकाे छ । भारतले भने एक जित एक हार र एक बराबरीबाट ४ अंकमा सीमित हुन पुग्याे ।

भारतले फाइनल पुग्ने हो भने आजै हुने अर्को खेलमा भुटानले बंगलादेशलाई अनिवार्य पराजित गर्नुपर्नेछ । तर यसअघिका दुई खेल हार्दै बाहिरिसकेको भुटानले बंगलादेशलाई हराउन निकै चुनौतीपूर्ण छ ।

सन् २०१८ मा पहिलोपटक भएको च्याम्पियनसिपमा नेपाल फाइनलमा बंगलादेशसँग पराजित भएको थियो ।