देउवाविरुद्धको मुद्दामा सर्वोच्चमा सुनुवाइ सुरू

२५ माघ, काठमाडौं । संसदमा प्रमुख प्रतिपक्ष दलको नेताको सुविधा नेपाली कांग्रेसका सभापति शेरबहादुर देउवालाई दिने संघीय संसद सचिवालयको निर्णय बदरकाे माग गरिएको रिट निवेदनमाथि न्यायाधीश शुष्मालता माथेमाको एकल इजलाशमा सुरू भएकाे छ । अहिले सुनुवाइ जारी छ ।

अधिवक्ता विमलप्रसाद पोखरेलले मंगलबार दायर गरेको रिट निवेदनमा पाँचौ नम्बरमा पेशी तोकिएको हो । अहिले रिट पक्षका वकिलहरुले बहस गरिरहेका छन् ।

यसअघि उक्त रिट सर्वोच्च प्रशासनले दरपिठ गरेपनि दरपिठ बदरको माग गर्दै इजलाशमा दायर निवेदनमा रिट दर्ताको आदेश दिएको थियो । आदेशपछि मंगलबार मात्र रिट दायर भएको हो । दर्तासगै आजको लागि पेशी तोकिएको थियो । पेशी दैनिक सूचीको पाचौं नम्बरमा परेको छ ।

रिट निवेदक पोखरेलले संघीय संसद सचिवालयले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएको नेपाली कांग्रेसलाई प्रमुख प्रतिपक्षको सुविधा दिनु कानून विपरीत भएकोले उक्त निर्णय खारेज हुनुपर्ने जिकिर गरेका छन् ।

संघीय संसद सचिवालयमा भने कांग्रेसले प्रधानमन्त्रीलाई विश्वसाको मत दिएर सत्ता पक्ष भइसकेको हुनाले प्रमुख प्रतिपक्ष आफूलाई बनाउनुपर्ने मागसहित नेमकिपाले पनि सचिवालयमा निवेदन दिएको थियो । प्रधानमन्त्रीलाई विश्वासको मत नदिने दलहरुमा नेमकिपा र राष्ट्रिय जनमोर्चामा थिए ।