सरकारले टर्कीलाई स्वास्थ्यकर्मी र अत्यावश्यक सामग्री पठाउने

२५ माघ, काठमाडौं । भूकम्प प्रभावित मुलुक टर्कीमा नेपालले राहत सामग्री र स्वास्थ्यकर्मी पठाउने भएको छ । बुधबार दिउँसो प्रधानमन्त्री तथा मन्त्रिपरिषद्को कार्यालयमा बसेको राष्ट्रिय विपद् जोखिम न्यूनिकरण तथा व्यवस्थापन राष्ट्रिय परिषदको बैठकले शक्तिशाली भूकम्पबाट गम्भीर रुपमा भाैतिक र मानवीय क्षति व्यहोरिरहेको टर्कीमा अत्यावश्यक सामग्री र स्वास्थ्यकर्मी पठाउने निर्णय गरेको हो ।

बैठकमा प्रधानमन्त्री पुष्पकमल दाहाल ‘प्रचण्ड’ले टर्की नेपालको असल मित्रराष्ट्र भएकाले नेपालका तर्फबाट सम्भव हुने सबै सहयोग गर्ने बताए । ‘हिजो हामीलाई अप्ठ्यारो पर्दा टर्की सरकारले सहयोग गरेको थियो । टर्की सरकारको दुःखमा हामीले पनि सहयोग गर्नुपर्छ’ प्रधानमन्त्रीले बैठकमा भने ।

बैठकमा उपप्रधानमन्त्री तथा अर्थमन्त्री विष्णु पौडेल, मुख्यसचिव शंकरदास बैरागी, नेपाली सेनाका प्रधानसेनापति लगायत समितिका पदाधिकारी र सदस्यहरू उपस्थित थिए ।

बैठकले आवश्यक तयारी गरेर छिटोभन्दा छिटो मेडिकल टोली, मेडिकल सामग्री, लजिष्टिक सामग्री र टर्कीको वातावरणसँग मिल्ने खाद्य सामग्री पठाउने निर्णय गरेको प्रधानमन्त्रीको सचिवालयले जनाएको छ ।

सोमबार बिहान टर्की र सिरियाको सीमा क्षेत्रमा भएको ७.९ म्याग्निच्युडको भूकम्पका कारण हालसम्म ९ हजार भन्दा बढी मानिसको मृत्यु भइसकेको छ । भने २० हजार भन्दा बढी मानिस घाइते भएका छन् । मृत्यु दर दुई तिहाई टर्कीमा भएको छ ।