रविको दोहोरो राहदानीमाथि अनुसन्धान अघि बढ्यो, सरकारी वकिलको कार्यालयले मगायो लामिछानेका कागजात

२६ माघ, काठमाडौं । जिल्ला सरकारी वकिल कार्यालय काठमाडौंले राष्ट्रिय स्वतन्त्र पार्टी (रास्वपा)का सभापति रवि लामिछानेको नागरिकता, राहदानीलगायत कागजात मगाएको छ ।

जिल्ला सरकारी वकिल कार्यालय काठमाडौंका प्रमुख अच्युतमणि न्यौपानेले लामिछानेविरूद्ध परेको जाहेरीमाथि छानबिन गर्न आवश्यक कागजात मगाएको बताए ।

उनले अध्यागमन विभागबाट पनि आवश्यक कागजात मगाएकौ बताए । कागजात प्राप्तिपछि अध्ययन गरेर निर्णय लिने उनको भनाइ छ ।

सिन्धुलीका युवराज पौडेलले जिल्ला प्रहरी परिसरमा दिएको निवर्तमान गृहमन्त्री रवि लामिछानेले कायम नभएको नागरिकता चलाएको र झुठा विवरण दिएर राहदानी बनाएको उजुरी दर्ता गर्न नमानेपछि पौडेलले सरकारी वकिल कार्यालयमा जाहेरी दिएका थिए ।

यसअघि पौडेलकै रिट निवेदनमा सर्वोच्च अदालतले दिएको आदेशबाट लामिछानेको सांसद, उपप्रधान तथा गृहमन्त्री र पार्टी सभापति खारेज भएको थियो ।

सर्वोच्चकै आदेशबमोजिम लामिछानेले पुनः नेपाली नागरक लिएपछि उनी पार्टी सभापतिमा भने फर्किसकेका छन् । सांसद र मन्त्री पद भने फिर्ता हुन सकेन ।