सरकारले सशस्त्र द्वन्द्वको योगदानलाई सम्मान गरेको उपराष्ट्रपति पुनको भनाइ

१ फागुन, जनकपुरधाम । उपराष्ट्रपति नन्दबहादुर पुन ‘पासाङ’ले जनयुद्ध दिवसमा सार्वजनिक बिदाको घोषणा गरेर नेपाली राजनीतिमा जनयुद्धले पुर्‍याएको योगदानको सम्मान गरेको बताएका छन् ।

सोमबार मधेशको गृह तथा सञ्चार मन्त्रालय अन्तर्गतको शहीद प्रतिष्ठानले आयोजना गरेको कार्यक्रममा उनले गणतन्त्र प्राप्तिका लागि जनयुद्धमा वीर शहिदहरुले बगाएको रगत र घाइतेहरुले गरेको त्याग र पसिनाको सम्मान भएको धारणा राखे ।

‘आज केन्द्र सरकारले दिएको बिदाले नेपाली राजनीतिमा जनयुद्धले पुर्‍याएको उच्चतम योगदानको सम्मान गरेको छ । गणतन्त्र प्राप्तिका लागि बगेको रगत र पसिनाको सम्मान गरेको छ । यसमा पूर्वाग्रह राख्नेहरुले चाहे जे सुकै किन नभनुन्, संघीय सरकारले सार्वजनिक बिदा दिनुअघि नै मधेश, वागमती र कर्णाली प्रदेश सरकारले सार्वजनिक बिदा दिएर जनयुद्ध दिवस मनाउने तयारी गरेको थियो’ उनले भने ।

उपराष्ट्रपति पुनले शान्ति सम्झौता भएको १६ वर्ष पुग्दा पनि शान्ति प्रक्रियाको काम पुरा नभएको भन्दै चिन्ता व्यक्त गरे । सत्य निरुपण तथा मेलमिलाप आयोग र वेपत्ताको छानबिन आयोगले अझै राम्रोसँग काम गर्न नसकेको उनको गुनासो थियो । शान्ति सम्झौताको बाँकी कामलाई छिटो टुंगोमा पुर्‍याउन सबै पक्षको साथ आवश्यक रहेको बताए ।

कार्यक्रममा विशिष्ट अतिथिका रुपमा प्रदेश प्रमुख हरिशंकर मिश्र, मुख्यमन्त्री सरोजकुमार यादव, सभामुख रामचन्द्र मण्डल र प्रदेश सरकारका मन्त्री लगाय नेताहरु सहभागी थिए ।

कार्यक्रममा ५४० जना शहीद परिवारलाई जनही एक लाख रुपैयाँ नगद प्रदान गरिने मधेशको आन्तरिक मामिला मन्त्रालयका सचिव रामकुमार महतोले जानकारी दिए ।