यातायात मजदुर आन्दोलनः बालाजु प्रहरी वृत्तका प्रमुख विष्ट हटाइए

२ फागुन, काठमाडौं । सोमबार बालाजु क्षेत्रमा यातायात मजदुर आन्दोनलाई लिएर प्रहरी वृत्त बालाजुका डीएसपी रविन विष्टलाई हटाइएको छ ।

डिएसपी विष्टलाई तत्कालका लागि उपत्यका प्रहरी कार्यालयमा फिर्ता बोलाएको उपत्यका प्रहरी कार्यालयले जनाएको छ । उनलाई आन्दोलनका क्रममा आवश्यक सतर्कता अपनाउन र परिस्थितिलाई नियन्त्रणमा लिन नसकेको आरोप लगाइएको छ । विष्टको ठाउँमा डीएसपी मनोजित कुँवरलाई पठाइएको छ ।

सोमबार माछापोखरी क्षेत्रमा यातायात मजदुरहरूले प्रहरी वृत्त बालाजुको स्वामित्वमा रहेको दुईवटा स्कार्पियो पिकअप भ्यान जलाएका थिए । सो बेला सुरक्षा मजबुत बनाउन नसकेको भन्दै विष्टलाई जिम्मेवारीबाट हटाइएको हो ।

प्रदर्शनमा भएको झडपमा डीएसपी विष्ट चढ्ने बा२ झ १४४ नम्बरको स्कोर्पियो आन्दोलित यातायात मजदुरले जलाएका थिए । प्रहरी वृत्त बालाजुको बा१ झ ७२२४ नम्बरको माज्दा गाडी पनि आन्दोलनकारीले जलाएर ध्वस्त पारेका छन् ।