मोवाइल लुटपाटको क्षतिपूर्ति राज्य दिनुपर्ने व्यवसायीको माग, उठाए सुरक्षा व्यवस्थामाथि प्रश्न

२ फागुन, काठमाडौं । मोबाइल व्यवसायीहरूले सोमबार काठमाडौंको नयाँ बसपार्क क्षेत्रमा भएको लुटपाटमा संलग्नलाई कारबाही र पीडितलाई राज्यले क्षतिपूर्ति दिनुपर्ने माग सरकारसँग गरेका छन् ।

सोमबार यातायात मजदुरहरूको प्रदर्शनका क्रममा ल्होत्से मलमा सञ्चालित मोबाइल पसलमा लुटपाट हुँदा उक्त मूल्यको मोवाइल लुटिएको नेपाल मोबाइल व्यवसायी महासंघका अध्यक्ष भरत भट्टराईले आज पत्रकार सम्मेलनमा बताए ।

महासंघले क्षतिपूर्ति र सुरक्षा माग गर्दै प्रधानमन्त्री कार्यालय, गृह मन्त्रालय लगायतमा ज्ञापनपत्र बुझाउने निर्णयसमेत गरेको छ । सीसी टीभीहरूामा पसलको सिसा र सटर तोडेरसमेत मोबाइल लुटिएको दृश्य कैद भएको र सोका आधारमा लुटेराहरू पत्ता लगाउन सजिलै सकिने उनको भनाइ छ । पसलको सीसीटीभी फुटेजसमेत सार्वजनिक भएको छ ।

महासंघका उपाध्यक्षसमेत रहेका पसलका सञ्चालक अर्जुन चालिसेले करिब ८/९ करोड रुपैयाँबराबरको मोबाइल लुटिएको जानकारी दिए । ल्होत्से मलमा रहेका उनको एसीडीसी मोबाइल पसल र डायमन्ड स्टार इन्भेस्टमेन्ट ग्रुप प्रालिमा लुटपाट भएको छ ।

पत्रकार सम्मेलनमा महासंघका अध्यक्ष भट्टराईले सोमबारको घटनामा संलग्नलाई कारबाही र व्यवसायीको सुरक्षा गर्न र राज्यले लुटपाटको क्षतिपूर्ति दिनुपर्ने बताए । क्षतिपूर्ति नदिए संघर्षका कार्यक्रमहरू घोषणा गर्ने उनले बताए ।

सोमबारको घटनाबाट हाम्रो सुरक्षा व्यवस्था कति कमजोर छ भन्ने पुष्टि भएको उनको भनाइ छ । यही घटनाको विरोधमा यही फागुन ५ गते माइतीघरमा प्रदर्शन गर्ने पनि उनले जानकारी दिए ।

आन्दोलनकारीले भने ल्होत्से बहुद्देश्यका संचालकहरुले आन्दोलनमा रहेका बेला आफूहरुमाथि आक्रमण गरेपछि आन्दोलन उग्र बनेको बताउँदै आएका छन् । आन्दोलनकारीले सोमबार बालाजु वृत्तका प्रहरीले प्रयोग गर्दै आइरहेका दुई वटा पिकअप भ्यान आगो लगाएर ध्वस्त बनाएका थिए ।