खुला विश्वविद्यालयको ३ वटा डीनका लागि आवेदन खुल्याे

७ फागुन, काठमाडौं । नेपाल खुला विश्वविद्यालयको डीन सिफारिस गर्न गठित समितिले ३ वटा संकायको डिन पदमा आवेदन आह्वान गरेको छ । डेढ वर्षदेखि रिक्त सामाजिक शास्त्र तथा शिक्षा संकाय, व्यवस्थापन तथा कानुन संकाय र विज्ञान, स्वास्थ्य तथा प्रविधि संकायको डीन पदमा सिफारिस समितिले आज आवेदन माग गरेको हो ।

आवेदन दिन सम्बन्धित संकायसँग सम्बद्ध कुनै विषयमा विद्यावारिधि गरेको, विश्वविद्यालय तथा उच्च शिक्षाका क्षेत्रमा कम्तीमा १० वर्ष पूर्णकालीन प्रध्यापन गरेको, प्राध्यापक वा सह(प्राध्यापक पदमा बहाल रहेको हुनुपर्ने मुख्य मापदण्ड तोकेको छ ।

त्यसैगरी संकायलाई प्राज्ञिक, प्रशासनिक तथा व्यवस्थापकीय नेतृत्व गर्न सक्ने कार्यक्षमता पुष्टि गर्ने आधारसहितको अभिलेख, खुला शिक्षा, दूर सिकाइ तथा अनलाइन सिकाइ प्रणालीमा प्राध्यापन तथा व्यवस्थापन गरेको अनुभव आवश्यक पर्ने उल्लेख छ ।

खुला विश्वविद्यालय व्यवस्थापन बुझेको आधारसहितको विवरण, आवेदन दिएको संकायको डिन पदमा नियुक्त भएमा ५४ वर्ष कार्यकालमा गर्ने प्राज्ञिक र वित्तीय व्यवस्थापन एवं संस्थागत विकासको योजना २५०० देखि ३००० शब्दसम्ममा लेखेर पनि पेश गर्नुपर्ने प्रावधान तोकिएको छ ।

इच्छुक उम्मेदवारले एक हप्ताभित्रमा आवेदन दिन सक्ने जनाइएको छ । कार्यकारी परिषद्ले डीन नियुक्तिका लागि सिफारिस गर्न गत साता समिति गठन गरेको थियो ।