‘इशा अवार्ड’ ग्रहणपछि सन्दुक रुइत भने- ‘यो सम्मान नेपाल र नेपालीलाई’

९ फागुन, काठमाडौं । नेत्र चिकित्सक डा. सन्दुक रुइतले प्रसिद्ध पुरस्कार ‘इशा अवार्ड’ ग्रहण गरेका छन् । मंगलबार बहराइनका राजा हमाद बिन इशा अल खालिफाबाट उनले अवार्ड ग्रहण गरेका छन् ।

राजधानी मान्मा आयोजित एक विशेष समारोहमा राजा खालिफाले १ मिलियन डलर अर्थात करिब १४ करोड रुपैयाँ बराबरको उक्त पुरस्कार डा. रुइतलाई प्रदान गरेका हुन् ।

इशा अवार्ड कमिटीका अध्यक्ष सेख मोहम्मद बिन मुबारक अल खलिफाले पनि डा. रुइत मानवहितकारी अर्थमा संसारकै लागि उदाहरण रहेको बताए । उनले आफ्ना पिता सेख इसा बिन सलमान अल खालिफाका नाममा सन् २००९ मा स्थापित यो सम्मान हरेक दुइ वर्षमा र ‘मानवताका लागि सेवा’ गर्ने विश्वभरकै कोही व्यक्तिरसंस्थालाई प्रदान गरिँदै आएको छ ।

तिलगंगा आँखा प्रतिष्ठानका कार्यकारी निर्देशक डा. रुइतले ‘विकासोन्मुख मुलुकका नागरिकमा रहेको अन्धोपनाको उपचारमा गरेको निरन्तरको प्रयत्नका निम्ति’ बहराइन सरकारले यो विशिष्ट सम्मान प्रदान गरेको हो ।

अवार्ड ग्रहणपछि डा. रुइतले प्राप्त अवार्ड राष्ट्र र नेपाली नागरिकमा समर्पित रहेको बताए । उनले अवार्डले आफूलाई अन्तर्राष्ट्रिय क्षेत्रमा प्रतिवद्धता र मेहेनतका साथ काम गर्ने अवसरका रुपमा थप प्रेरणा दिएको बताए ।

विगत ३ दशकदेखि नेत्रको उपचार र यससम्बन्धी अध्ययन तथा विकासमा खटिरहेका उनले आफ्नै हातले अहिलेसम्म एक लाख २५ हजार भन्दा धेरै व्यक्तिको शल्यक्रिया गरिसकेका छन् र ७० भन्दा बढी देशमा सेवा दिइसकेका छन् ।
इशा अवार्ड पहिलोपटक मलेशियाकी प्रतिष्ठित चिकित्सक जेमिला महमुदले २०१३ मा पाएकी थिइन् । दोस्रो अवार्ड (२०१५) भारतका शिक्षाविद् अच्युता सामन्तले र तेस्रो (२०१७) इजिप्टको चिल्ड्रेन क्यान्सर हस्पिटललाई प्रदान गरिएको थियो । चौथो अवार्ड भने पाकिस्तानको प्रतिष्ठित सामाजिक सेवक संस्था इधी फाउन्डेसनलाई प्रदान गरिएको थियो ।