राष्ट्रपति निर्वाचनको सरगर्मी, दलीय छलफलकाे तीव्रता

१० फागुन, काठमाडौं । राष्ट्रपति निर्वाचनको मिति जति नजिकिदै छ त्यति नै शीर्ष नेताहरूको दौडधूप पनि व्यापक भैइरहेको छ । नेपाली कांग्रेसका सभापति शेरबहादुर देउवा र जसपा अध्यक्ष उपेन्द्र यादवबीच आज समसामयिक राजनीतिका विषयमा छलफल भएको छ । धुम्बाराहीस्थित देउवा निवासमा उनीहरुबीच राष्ट्रपतिलगायतका विषयमा छलफल भएको हाे ।

राष्ट्रपति कसलाई बनाउने भन्ने विषयलाई लिएर राजनीतिक सरगर्मी बढेका बेला दुई शीर्षनेताबीच छलफल भएको हो । देउवालाई भेटेर धुम्बाराहीबाट अध्यक्ष यादव बाहिरिएका छन् । यादव बाहिरिने वित्तिकै देउवालाई भेट्न आजै माधव नेपाल धुम्बाराही पुगेका छन् । एकीकृत समाजवादी अध्यक्ष समेत रहेका नेपाल केहीबेर अघि मात्र सभापति देउवालाई भेट्न धुम्बाराही पुगेका हुन् ।

पार्टीका महासचिव बेदुराम भुसाल र नेता घनश्याम भुसाललाई लिएर अध्यक्ष नेपाल धुम्बाराहीस्थित देउवा निवासमा राष्ट्रपति निर्वाचन केन्द्रित छलफलमा छन् । बुधबार बसेको पार्टी केन्द्रीय सचिवालय बैठकमा एमाले अध्यक्ष केपी शर्मा ओलीसँग चार घण्टा भेटघाट भएको र सो क्रममा पार्टी एकताको प्रस्ताव राखेको ब्रिफिङ गरेका अध्यक्ष नेपाल दुई शीर्षनेता लिएर देउवा भेट्न पुगेका हुन् ।

एमाले अध्यक्ष ओलीले अध्यक्ष नेपाललाई राष्ट्रपति बनाउन प्रस्ताव राखेका बेला राष्ट्रपतिको दाबेदारी गरिरहेको कांग्रेसका सभापति देउवालाई भेट्न एकीकृत समाजवादीका नेता धुम्बाराही पुगेको स्रोतले बतायो । ओलीले राखेको प्रस्तावमा आफूले विश्वास गर्न नसकेको बैठकमा अध्यक्ष नेपालले बताएका छन् ।

दलीय छलफलले तीव्रता पाइरहेका बेला देउवा निवास धुम्बाराहीमा वरिष्ठ नेता रामचन्द्र पौडेल, महामन्त्री गगन थापासहितका नेताहरु बसिरहेका छन् । नेकपा एस राष्ट्रपति निर्वाचनमा एमाले र कांग्रेस दुवैतिर शक्तिका लागि बार्गेनिङ गर्ने रणनीति दौडिएको छ ।

आज बसको पार्टीको केन्द्रीय सचिवालय बैठकले पनि राष्ट्रपतिमा सकेसम्म राष्ट्रिय सहमति बन्नुपर्ने, यदि त्यस्तो सहमति नभए सम्भावित समीकरणमा आफ्नो दल संसद्मा रहेका सबै राजनीतिक दलसँग संवादका लागि खुला रहने निर्णय गरेको छ । राष्ट्रपति निर्वाचनबारे अन्योल सिर्जना भइरहेका बेला नेकपा एसले भने मध्यमार्गी बाटो लिएर एमाले र कांग्रेस दुवै दलसँग बार्गेनिङ गर्ने बाटो बनाएको देखिन्छ ।