लिग टु सिरिज विजेता खेलाडीलाई जनही २ लाख दिने सरकारको घोषणा

११ फागुन, काठमाडौं । सरकारले आईसीसी विश्वकप क्रिकेट लिग-२ अन्तर्गत काठमाडौंमा भएको सिरिज विजेता नेपाली क्रिकेट टोलीका सदस्यहरुलाई जनही २ लाख रुपैयाँ दिने घोषणा गरेको छ ।

बिहीबार नेपाली राष्ट्रिय क्रिकेट टोलीका सदस्यहरुले प्रधानमन्त्री पुष्पकमल दाहाल ‘प्रचण्ड’लाई बालुवाटारमा भेटेका थिए । सो क्रममा प्रधानमन्त्री प्रचण्डले खेलाडीको पुरस्कार रकम घोषणा गरेका हुन् ।

प्रधानमन्त्रीले योपटक सबै खेल जितेर नेपाली जनताको शिर ठाडो बनाउने ऐतिहासिक भूमिका खेलेको बताउँदै नेपाल सरकारको तर्फबाट प्रेरणास्वरुप जनही २ लाख रुपैयाँ दिने घोषणा गरेका हुन् । खेलकुद मन्त्रालयले जिम्मेवारी प्रधानमन्त्री प्रचण्डले नै सम्हालिरहेका छन् ।

गत हप्ता त्रिवि क्रिकेट मैदानमा भएको नामिबिया र स्कटल्याण्डविरुद्धको चार खेलको शृंखला नेपालले चारै वटा खेल जितेर क्लिनस्वीप गरेको थियो । नेपाली राष्ट्रिय क्रिकेट टोली आईसीसी विश्वकप क्रिकेट लिग–टु अन्तर्गत १५ देखि २२ फागुनसम्म युएईमा हुने सिरिजका लागि नेपाली टोली १३ फागुनमा त्यसतफ जाँदैछ ।