चार दलका शीर्ष नेताहरुबीचकाे बैठक स्थगित

११ फागुन, काठमाडौं । प्रधानमन्त्री निवास बालुवाटारमा पुरानो गठबन्धनका चार दलका शीर्ष नेताहरुबीच बस्ने भनिएको बैठक नहुने भएको छ । बिहीबार बेलुका ६ बजे शीर्ष नेताहरुबीच राष्ट्रपतिका विषयमा छलफल गर्ने भनिएकामा अन्तिममा बैठक रोकिएको हो ।

स्थगित बैठक अब कहिले बस्ने भन्नेबारे टुंगो लागिनसकेको प्रधामन्त्रीको सचिवालयले जनाएको छ । राष्ट्रपतिको उम्मेदवारका विषयमा प्रधानमन्त्री निवासमा कांग्रेस, माओवादी केन्द्र, जसपा र एकीकृत समाजवादी गरी ४ दलका शीर्ष नेताहरुबीच आज साँझ बैठक बस्ने तय भएको थियो ।

दुई पक्षीय र त्रिपक्षीय बैठकका कारण समयाभाव भएपछि बैठक स्थगित गरिएको सचिवालयले जनाएको छ । ४ दलका शीर्ष नेताहरुबीच बस्ने बैठकले कांग्रेससहितका पहिलेका पाँच दलीय गठबन्धन ब्यूँताउने विश्लेषण गरिएकाे छ ।

नेपाली कांग्रेसले राष्ट्रपतिमा आफूले उम्मेदवार उठाउने र त्यसमा ३ दलसँग समर्थन जुटाउने योजना बनाएको छ । तर एमालेले भने एकीकृत समाजवादीका अध्यक्ष माधवकुमार नेपाललाई राष्ट्रपतिका लागि उम्मेदवार बनाउने कोशिस गरिरहेको छ ।