सांसद अरुण चौधरीले राष्ट्रपति निर्वाचनमा मतदान गर्न पाउने

१२ फागुन, काठमाडौं । राष्ट्रपतिबाट यसै हप्ता आममाफी पाएर जेलमुक्त भएका नागरिक उन्मुक्ति पार्टी (नाउपा)का सांसद अरुणकुमार चौधरीको निलम्बन फुकुवा भएसँगै राष्ट्रपतिको निर्वाचनमा मतदान गर्न पाउने भएका छन् ।

जेल पर्दा सांसद पद निलम्वन गरिएको थियो । रिहाइपछि उनलाई संघीय संसद सचिालयले पठाएको निलम्बन फुकुवा भएकाे पत्र निर्वाचन आयोगमा पुगेसँगै उनको नाम शुक्रबार हुने अन्तिम मतदाता नामावलीमा समावेश गर्ने भएको छ ।

बिहीबार निर्वाचन आयोगमा सांसद चौधरीमाथि संसद्ले गरेको निलम्बन फुकुवाको पत्र पुगेसँगै उनको नाम मतादाता सूचीमा समावेश गरेर अन्तिम नामावली प्रकाशन गरिने आयोगले जनाएको छ ।

सांसद चौधरी कैलाली जिल्ला अदालतको आदेश कार्यान्वयन गराउनका लागि गत माघ १९ गते पक्राउ परेका थिए । तर उनलाई यही फागुन ७ मा प्रजातन्त्र दिवसमा ५० प्रतिशत कैद भुक्तान गरिसकेका र चालचलनमा सवल मानिएका कैदीलाई दिइने आममाफी सूचीमा राखेर रिहाई गरिएको थियो ।

अर्का सांसद महोत्तरी १ बाट निर्वाचित एमालेका सांसद लक्ष्मी महतो कोइरीलाई मतदानमा सहभागी नहुने अडकल गरिएको छ । उनलाई प्रहरीले हत्या अभियोगका फरार सूचीमा राखेर खोजी गरिरहेको छ । संसद सचिवालयले भने उनले उनलाई अहिलेसम्म निलम्वन गर्न सकेको छैन । उनको नाम राष्ट्रपति निर्वाचनको पारम्भिक नामावलीमा समावेश छ ।

फागुन २५ मा हुने राष्ट्रपति निर्वाचनका लागि भोलि शनिबार उम्मेदवारी दर्ता हुँदैछ । मतदाताको अन्तिम नामावली भने आजै सार्वजनिक गर्ने तयारी निर्वाचन आयोगको छ ।