सन्दीपको रिटमा सर्वोच्चमा सुनुवाइ जारी

१२ फागुन, काठमाडौं । क्रिकेट प्रतियोगितामा सहभागी हुन यूएई जान पाउनुपर्ने मागसहित सन्दीप लामिछाने बिहीबार सर्वोच्च अदालतमा दायर गराएको रिट निवेदनमा सुनुवाइ सुरु भएको छ । सुनुवाइ न्यायाधीश ईश्वरप्रसाद खतिवडाको इजलासमा जारी छ ।

गएको पुष २७ मा उच्च अदालत पाटनले सन्दीपलाई विदेश जान प्रतिबन्धसहितको आदेश जारी गरेकामा उक्त प्रतिबन्ध फुकुवाको मागदाबीसहित उनले बिहीबार रिट निवेदन दायर गराएका थिए । रिटमा आजै आदेश हुन सक्ने ठानिएको छ ।

नाबालिका बलात्कारका अभियुक्त उनलाई जिल्ला अदालत काठमाडौंले थुनामा पठाएकामा पछि उच्च अदालतमा परेको उनको रिटमा पाटनले काठमाडौं छाडन नपाउने गरी २० लाख रुपैया धरौटीमा रिहा गरेको थियो ।

धरौटी बुझाएर फर्किएका पुष २८ मा रिहा भएका सन्दीपलाई क्यानले राष्ट्रिय टिममा फर्काए पनि विदेश लैजान भने सक्ने अवस्था छैन । यही अवस्था चिर्न सन्दीपले सर्वोच्च अदालतको बाटो रोजेका हुन् । सन्दीपबिनै नेपाली टोली शनिबार यूएई प्रस्थान गर्ने तयारीमा छ ।