राष्ट्रपति एमालेको हुन्छ भन्ने कुरा पुष १० मै टुंगो लगाएका हौं : अध्यक्ष ओली

१२ फागुन, काठमाडौं । नेकपा (एमाले)का अध्यक्ष केपी शर्मा ओलीले राष्ट्रपनि एमालेबाटै बन्ने दाबी दोहो्याएका छन् । शुक्रबार प्रतिनिधिसभाको बैठकबाट बाहिरिने क्रममा संसद भवन परिसरमा सञ्चारकर्मीहरुसँग कुरा गर्दै अध्यक्ष ओलीले गत पुष १० गते नै राष्ट्रपति एमालेले पाउने कुरा टुंगो लागिसकेको बताए ।

उनले राष्ट्रपतिबारे थप घटनाक्रम थाहा नभएको बताए । उनले पुष १० मा माओवादी केन्द्रका अध्यक्ष प्रचण्ड प्रधानमन्त्री नियुक्त हुँदा बखतनै राष्ट्रपति एमालेले लिने सहमति भइसकेको भन्ने एमालेले गर्दै आइरहेको विषयलाई दोहोर्याए ।

ओलीले पछिल्लोे समय एमालेका नभई एमालेले उठाउने उम्मेदवार नै राष्ट्रपति बन्ने बताउँदै आएका छन् । उनले पार्टीका नेता सुवास नेम्वाङको नाम ‘शिफ्ट’ गरेर एकीकृत समाजवादीका अध्यक्ष माधवकुमार नेपालको नाम लिएका छन् ।

तर प्रधानमन्त्री प्रचण्ड भने एकीकृत समाजवादी, जसपालाई लिएर कांग्रेससँग राष्ट्रपति पदका लागि छलफल दुई पक्ष, बहुपक्षीय वार्ता चलाइरहेका छन् ।

यसैबीच शुक्रबार नै संसद्‍ बैठकपछि अध्यक्ष ओली र प्रधानमन्त्री प्रचण्डबीच वार्ता हुने भएको छ । माओवादी केन्द्रले पूर्वसहमति अनुसार राष्ट्रपतिमा एमालेलाई समर्थन नगरे सरकारबाट बाहिरिने एमालेका नेताहरुले बताइरहेका छन् ।