प्रतिनिधिसभा बैठकः गणपूरक संख्या नपुग्दा विधेयक निर्णायर्थ प्रस्तुत भएन, अर्को बैठक फागुन १५ मा

१२ फागुन, काठमाडौं । प्रतिनिधिसभाको बैठक फागुन १५ गते सम्मका लागि स्थगित भएको छ । शुक्रबार बसेको बैठकमा सांसदहरुले शून्य र विशेषमा समसामयिक विषयमा सरकारको ध्यानाकर्षण गराएका थिए ।

सोही बैठकमा सरकारको प्रधानमन्त्री प्रचण्डको तर्फबाट संचारमन्त्री रेखा शर्माले राष्ट्रियसभाबाट सन्देशसहित प्राप्त ‘अनुगमन तथा मूल्यांकन विधयेक २०७८’ छलफलका पेस गरिन् ।

पेसपछि प्रदीप पौडेल संजय गौतम लगायत १३ जनना सांसदहरुले सुझावसहित धारणा राखे । सांसदहरुले राखेका धारणा र उठाएका प्रश्नको जवाफ मन्त्री शर्माले दिइन् । जवाफ दिने क्रम सकेपछि बैठकमा गणपूरक सदस्यहरुको उपस्थिति नरहेपछि सभामुख देवराज घिमिरेले नियमावलीअनुसार विधेयक प्रस्तुत गर्न नमिल्ने भन्दै बैठक स्थगित गरेका छन् ।

अर्को बैठक यही फागुन १५ गते दिउँसो २ बजे बस्ने गरी स्थगित गरिएको जानकारी दिए । बैठकमा ५० जनाभन्दा कम सदस्य उपस्थित रहेकाे भन्दै विधेयक निर्णायर्थ प्रस्तुत नगरिएकाे हाे । प्रस्तुतका लागि कूल संख्या २७५ एक चाैथाइ आवश्यक पर्छ । बैठकमा गणपूरक सख्या भए नभएको यकिन गर्न ३ मिनेट जनाउ घण्टी बजाइएको थियो ।

बैठकमा सरकारका २ जना मात्र मन्त्री बैठकमा सहभागी थिए ।