सन्दीपको मुद्दामा दोस्रो दिनको सुनुवाइ सुरु हुन सकेन

१५ फागुन, काठमाडौं । नाबालिगमाथि बलात्कार मुद्दाका अभियुक्त क्रिकेटर सन्दीप लामिछानेको संयुक्त रिटमा सर्वोच्च अदालतमा दोस्रो दिनको सुनुवाइ सुरु हुन सकेको छैन ।

न्यायाधीशद्वय सपना प्रधान मल्ल र कुमार चुडालको संयुक्त बन्द इजलासमा आइतबार सुनुवाइ नसकिएपछि आज ‘हेर्दाहेर्दै’मा राखिएको थियो । सुनुवाइ सोमबार निरन्तरता दिने भनिएको थियो । तर आहिलेसम्म सुनुवाइ सुरु भएको छैन ।

सन्दीपले आफूमाथि उच्च अदालत पाटनले गएको पुष २७ मा विदेश यात्रामा जान बन्देजसहित २० लाख रुपैयाँ धरौटी लिने आदेशको खारेजी माग गर्दै यही फागुन ११ मा सर्वोच्चमा रिट निवेदन दिएका थिए । तर त्यसअघि नै काठमाडौं जिल्ला अदालतले महान्यायाधिवक्ता कार्यालयको राय लिएर सरकारी वकिलको कार्यालय काठमाडौंले उच्चले दिएको धरौटीमा छाड्ने आदेशको बदर गरेर बलात्कार कसुरका अभियुक्त सन्दीपलाई थुनामा राखेर मुद्दा पुर्पक्ष गर्नुपर्ने काठमाडौं अदालतको आदेश सदर गर्नुपर्ने मागसहित रिट दायर थियो ।

सर्वोच्चले वकिल कार्यालय र सन्दीपको रिटलाई एकै ठाउँमा राखेर बन्द इजसालमा सुनुवाइ सुरु गरेको हो । सुनुवाइ निरन्तर नहुनुको कारणबारे सर्वोच्च प्रशासनले केही बताएको छैन ।

आइतबार सरकारी वकिलतर्फबाट वकिलहरुको बहस सकिएको थियो सन्दीप पक्षका केही वकिलबाहेक बाँकीले आज बहस गर्दैछ । न्यायाधीशद्वयको संयुक्त इजलासमा सोमबारका लागि सन्दीपसँग सम्बन्धित उक्त २ वटा मुद्दाको मात्र पेसी चढेको छ ।