सरकारलाई रास्वपाले दिएको समर्थन कायमै रहने

१५ फागुन, काठमाडौं । राष्ट्रिय स्वतन्त्र पार्टीले सरकारलाई दिएको समर्थन कायम रहने भएको छ । सोमबार बसेको पार्टीको केन्द्रीय समिति बैठकले सरकारलाई दिएको समर्थन फिर्ता लिने वा नलिने विषयमा कुनै निर्णय गर्न नसकेपछि हालका लागि समर्थन कायम रहने भएको हो ।

अर्को निर्णय नहुँदासम्म सरकारका विषयमा पार्टीको पूर्वनिर्णय नै कायम रहने बैठकपछि सहमहामन्त्री कविन्द्र बुर्लाकोटीले बताए । रास्वपा गत २२ माघमा नै आफ्ना ३ मन्त्री र एक राज्यमन्त्रीलाई सरकारबाट फिर्ता गराएर सरकारबाट बाहिरिए पनि समर्थन कायम राख्दै आएको थियो ।

यसबिचमा तत्काली सरकार गठनका बेल एमालेसहित ७ दलीय गठबन्धनको निर्णयअनुसार माओवादी केन्द्रका अध्यक्ष प्रचण्डलाई प्रधानमन्त्री नियुक्तिमा समर्थनन गर्ने निर्णयमा रास्वपा सामेल थियो । समर्थनको उक्त निर्णय नै कायम रहने भएको छ ।

तर एमालेलाई अलग्याउने गरी बनाइएको माओवादी केन्द्र, कांग्रेस एकीकृत समाजवादीसहितको ८ दलीय गठबन्धनमा भने रास्वपा सामेल भइसकेको छैन । रास्वपा ‘हेर र पर्ख’को रणनीतिमा बसेको देखिन्छ ।