मोबाइललाई स्वीच अफ गर्न सांसदहरुलाई राष्ट्रियसभा अध्यक्षको रुलिङ

१५ फागुन, काठमाडौं । राष्ट्रिय सभाका अध्यक्ष गणेशप्रसाद तिमिल्सनाले संसदको बैठकमा सहभागी हुँदा मोबाइल साइलेन्स मोडमा राख्न सांसदहरुलाई रुलिङ गरेका छन् ।

‘माननीय सदस्यहरु मोबाइल धेरै बजेको छ । त्यसलाई साइलेन्स वा स्वीच अफ गर्नुस्’ आजको बैठकमा सभाध्यक्ष तिमिल्सनाले रुलिङ गरे । राष्ट्रिय सभाको बैठकको प्रारम्भकै परराष्ट्रमन्त्री विमला राई पौड्यालले सम्बोधन गर्दै थिइन् ।
आफ्नो जेनेभा भ्रमण रोकिएको विषयमा सञ्चारमाध्यमहरुमा धेरै समाचार र जिज्ञासाहरु आएको उल्लेख गर्दै उनी आफ्नो भ्रमण रद्द भएको विषयका सम्बन्धमा संसदलाई जानकारी गराइन् ।

त्यसबेला कतिपय सांसदहरु मोबाइल कुराकानीमा व्यस्त थिए । कतिपय सांसदहरुको मोबाइलमा फोन आएर घण्टी बजिरहेको थियो । त्यसपछि सभाध्यक्ष तिमिल्सनाले मोबाइल साइसेन्स मोडमा राख्न वा स्वीच अफ गर्न सांसदलाई रुलिङ गरेका हुन् ।

राष्ट्रियसभा नियमावलीमा बैठकको सुव्यवस्थासम्बन्धी व्यवस्थाले ‘बैठकमा अभद्र व्यवहार गर्ने सदस्यलाई आफ्नो व्यवहार नियन्त्रण गर्न अध्यक्षले चेतावनी दिन सक्ने र चेतावनीपछि आफ्नो व्यवहारमाथि तुरुन्त नियन्त्रण गर्नुपर्ने भनेको छ ।