प्रधानमन्त्री प्रचण्डसँग १६ मन्त्रालय, सरकारकाे समर्थनबाट ३ दल अलग्गिए

१५ फागुन, काठमाडौं । सरकारका मुख्य घटक नेकपा (एमाले)ले सोमबार सरकार छाडेसँगै प्रधानमन्त्री पुष्पकमल दाहाल ‘प्रचण्ड’को जिम्मामा १६ मन्त्रालय परेका छन् ।

उनी गत पुष ११ मा प्रधानमन्त्रीमा शपथ खाएपछि एमालेका ८, रास्वपा ३, राप्रपाका ३ मन्त्री, आफ्नै पार्टीकासहित मन्त्रिमण्डल गरेका प्रधानमन्त्री प्रचण्डलाई एमाले, रास्वपा र राप्रपाले साथ छाडेपछि मन्त्रालयको जिम्मेवारी उनैको काँधमा आएको छ । यद्यपि सुरुदेखि वन र खेलकुद मन्त्रालयको जिम्मेवारी उनैसँग थियो ।

सरकारका साझेदार ७ दलमध्ये ३ दलले सरकार छाडेसँगै प्रचण्ड अल्पमत परेका छन् । किनकि उनले पुष १० मा प्रधानमन्त्रीका लागि राष्ट्रपति विद्यादेवी भण्डारीसमक्ष दाबी पेश गर्दाका बखत पेस गरिएका सांसदहरुमध्ये ११२ जना बाहिरिइसकेको अवस्था छ ।

सरकारकाे साथमा अब सिके राउत नेतृत्वकाे जनमत पार्टी मात्र छ । जनमतबाट पार्टी उपाध्यक्षा अब्दुल खान खानेपानी मन्त्री छन् । प्रधानमन्त्री नियुक्तिका बेला समर्थन जनाएपनि नाउपा र जसपा सरकारमै सहभागी भएका छैनन् । यही अवस्थाबीच प्रचण्डले कांग्रेससँग मिलेर ८ दलीय गठबन्धन बनाइसकेका छन् । अब कांग्रेस चाँडै सरकारमा जाने अनुमान गरिएकाे छ ।