यूके पठाइदिने प्रलोभन देखाएर ठगी गरेकाे आरोपमा भारतीयसहित २ जना पक्राउ

१५ फागुन, काठमाडौं । बेलायत (यूके) पठाइदिन्छु भनेर ठगी गरेको आरोपमा प्रहरीले एक नेपाली महिलासहित दुई जनालाई पक्राउ गरेको छ ।

उनीहरुले फेसबुक, ह्वाट्सएप, इन्स्टाग्राम र टिकटकबाट साथी बनाई आफू मलेसियाको नागरिक हाल बेलायतमा डाक्टर रहेको भन्दै बेलायतमा रोजगारी मिलाइने प्रलोभन देखाएर २३ लाख रुपैयाँ ठगी गरेको खुलेको छ ।

पक्राउ पर्नेमा काठमाडौं कालिमाटी बस्दै आएका भारतीय नागरिक सुदिशकुमार साह र बनेपा नगरपालिका घर भई कालिमाटी बस्दै आएकी सुनिता परियार रहेका उपत्यका अपराध अनुसन्धान कार्यालयले जनाएको छ । दुई जनालाई काठमाडाैंकाे विभन्न स्थानबाट आइतबार पक्राउ गरिएकाे हाे ।

उनीहरुले पार्सल, आकर्षक गिफ्ट, डलर लगायतको सामान पठाएको छु भन्ने र सो गिफ्ट भारतको इन्दिरा गान्धी एयरपोर्टमा आइपुगेको भन्दै भन्सार शुल्कका पैसा पठाउन लगाएर ठगी गरेका थिए । ठगीका रकम सुनिता परियारको खातामा २३ लाख रुपैयाँ फेला परेको प्रहरीले जनाएको छ । दुई जनाविरुद्ध ४ जनाको उजुरप् परेको छ ।