प्रदेश १ को नामाकरण प्रस्तावमाथि बैठकमा छलफल सुरु

१७ फागुन, माेरङ । प्रदेश १ को नामकरणको विषयमा छलफल गर्न विराटनगरस्थित प्रदेशसभाको बैठक सुरु भएको छ । प्रदेशमा नामकरणका लागि ‘कोशी’ प्रदेश र ‘किरात लिम्बुवान सगरमाथा’ प्रदेश राख्ने प्रस्ताव बुधबार प्रदेशसभा सचिवालयमा दर्ता भएको छ ।

एमालेले कोशी नाम राख्नुपर्ने प्रस्ताव गरेको छ भने एकीकृत समाजवादी र जनता समाजवादी पार्टीले किरात लिम्बुवान सगरमाथा राख्न प्रस्ताव गरेको छ । नेपाली कांग्रेस र नेकपा (माओवादी केन्द्र)ले कोशी प्रदेशको पक्षमा मतदान गर्ने बताएका छन् । कांग्रेसले यसअघि एमालेसँग मिलेर कोशी नाम प्रस्ताव गरेपनि ‘माथि’को दबाबमा प्रस्तावक र समर्थकबाट नाम फिर्ता लिएको छ ।

प्रदेशको नाम प्रदेशसभाको दुई तिहाइ बहुमतले राख्ने संवैधानिक व्यवस्था छ । कुल ९३ सदस्यीय प्रदेशसभामा एमाले ४०, कांग्रेस २९ र माओवादी केन्द्र १३ सदस्य संख्यासहित दुई तिहाइ छ । एकीकृत ४ र जसपा १ सदस्य छन् । राप्रपासँग ६ सदस्य छन् । कोशी नाम पारित हुने पक्का देखिएको छ । प्रदेशको नामाकरण आजै टुंग्याउने भएको छ ।

नामाकरणलाई लिएर विरोध प्रदर्शन हुनसक्ने भन्दै जिल्ला प्रशासन कार्यालय मोरङले आज दिउँसो ३ बजेदेखि मुख्यमन्त्री कार्यालय, प्रदेशसभा भवन र मुख्यमन्त्री निवास वरपर लगायत विभिन्न क्षेत्रमा अनिश्चितकालीन निषेधाज्ञा जारी गरेको छ ।

निषेधाज्ञाको समयमा विरोध, जुलुस, प्रदर्शन, भीड जम्मा हुन रोक लगाइएको छ । निषेधाज्ञा उल्ल.घन गरेमा कानुनबमोजिम कारबाही हुने प्रमुख जिल्ला अधिकारी (सीडीओ) तीर्थराज भट्टराईद्वारा बुधबार जारी जरुरी सूचनामा उल्लेख छ ।