आत्महत्याको प्रयास गरेकी शर्मिला वाइबाकाे वीर अस्पतालकाे आईसीयूमा उपचार हुँदै

१८ फागुन, काठमाडौं । सामाजिक अभियन्ताको रुपमा चिनिने शर्मिला वाइबाले विष पिएर आत्महत्याको प्रयास गरेकी छन् । उनी गएराति काठमाडौंको बानियाँटारस्थित आफ्नै निवासमा विष खाएर बेहोस भएकी थिइन् । त्यसपछि उद्धार गरी वीर अस्पताल पुर्याइएकी उनको आईसीयूमा उपचार भइरहेको छ ।

वाइबा बाेल्न नसक्ने अवस्थामा रहेकाे र अवस्था चिन्ताजनक रहेको अस्पताल स्रोतले बतायो । विष शरीरमा फैलिइसकेकाले हाेसमा ल्याउन समय लााग्ने बताइएकाे छ । विष पिउनुको कारणबारे खुल्न नसकेको प्रहरीको भनाइ छ ।

वाइबा केही समयअघि एकजना पत्रकारसँग नाम जोडेर विवादमा आएकी थिइन् । वाइबा यही मंगलबार अभिनेता पल शाह काठमाडौं आउँदा स्वागत गर्न विमानस्थल पुगेकी बेला उनले गायक राजेश पायल राईसँग लफडा समेत गरेकी थिइन् ।