राष्ट्रियसभा उपाध्यक्ष अर्यालले गरिन् राष्ट्रपति भण्डारीको चर्काे आलोचना

१८ फागुन, काठमाडौं । नवनिर्वाचित राष्ट्रियसभाकी उपाध्यक्ष उर्मिला अर्यालले राष्ट्रपति विद्यादेवी भण्डारीको चर्को आलोचना गरेकी छन् ।

आज संसदीय पत्रकारहरूसँग आफ्नै कार्यकक्षमा कुराकानी गर्दै उपाध्यक्ष अर्यालले राष्ट्रपति भण्डारीको भूमिका लोकतान्त्रिक र निष्पक्ष नभएको भन्दै आलोचना गरेकी हुन् ।

‘राष्ट्रपति जी एमालेको जस्तो बन्नुभयो। उहाँले राष्ट्रपति संस्थालाई सम्मानित बनाउन सक्नुभएन । अरूको इसारामा चल्नुभयो,’ उपाध्यक्ष अर्यालले भनिन्, ‘नागरिकता विधेयकमा अनावश्यक राजनीति गरेर रोक्ने काम गर्नुभयो। एकपटक विधेयक फिर्ता गरे पनि अर्कोपटक रोक्न मिल्थेन तर प्रमाणिकरण नगरेर रोक्दिनुभयो ।’

नागरिकता विधेयक रोकेकै कारण नहुँदा धेरैले नागरिकता नपाएको उनले भनिन् । ‘राष्ट्रपतिजीले आफ्नो भूमिका कार्यकारीजस्तो ठान्नुभयो, पदको गरिमा राख्नुभएन‘ उनले भनिन्, ‘म उपाध्यक्ष भएर आफ्नो भूमिका बिर्सिएँ र अर्थोकै गरेँ भने राम्रो हुँदैन ।’

अर्याल ३ हप्ता पहिले मात्र राष्ट्रिय सभामा उपाध्यक्ष निर्वाचित भएकी हुन् । उनी माओवादी केन्द्रकाे काेटाबाट निर्वाचित भएकी थिइन् ।