नेपालले दियो युएईलाई १९२ रनको लक्ष्य

१८ फागुन, काठमाडौं । नेपालले आइसिसी यू–१९ विश्वकप एसिया क्षेत्र छनोटको अन्तिम खेलमा आज युएईलाई १९२ रनको लक्ष्य दिएको छ । युएईको आजमानस्थित इडेन गार्डेन ओभलमा टस हारेर पहिला ब्याटिङ गरेको नेपालले ४८।५ ओभरमा अलआउट हुँदै १ सय ९१ रन जोडदै १९२ रनको रक्ष्य दिएको हो ।

नेपालका लागि कप्तान देव खनालले सर्वाधिक ५१ रनसहित अर्धशतक पार गरे । ८४ बल खेलेका उनले ३ चौका र १ छक्का प्रहार गरे । देव बाहेक अन्य कुनै पनि ब्याटरले राम्रो प्रदर्शन गर्न सकेनन् ।

एक समय १९–३ को अवस्थामा पुगेको नेपाललाई चौथो विकेटका लागि उत्तम थापामगर र देव खनालले ८४ रनको उत्कृष्ट साझेदारी गर्दै खेलमा फर्काएका थिए। ३६ रन बनाएर उत्तम एलबीडब्लूको धरापमा परे । उत्तमले ४८ बलमा ३ चौका र १ छक्का प्रहार गरेका थिए ।

चौथो ओभरको पाँचौं बलमा नेपालका अर्का ओपनर अर्जुन कुमाल व्यक्तिगत ३ रनमा आउट भए । आकाश त्रिपाठीले ९ रन विशालविक्रम केसीले ५० बलमा ५ चौकासहित ३८ रन योगदान गरे ।

मिलन बोहरा २१ बलमा १ चौकासहित १० रन बनाउँदा हेमन्त धामी १३ रनमा आउट भए। दीपेश कँडेल १५ रनमा आउट भए ।